Փաշինյանը նոր քրգործեր է հարուցում ընդդիմախոսների և չենթարկվողների դեմ
ՎԵՐԼՈՒԾՈՒԹՅՈՒՆՆԵՐ
Վերջին օրերին գործող վարչախումբը կտրուկ ավելացրել է ընդդիմադիր գործիչների դեմ քրեական վարույթների թիվը։
Հայաստանում և Արցախում բազմաթիվ անձինք, ովքեր երբևէ քննադատական խոսք են հնչեցրել փաշինյանանակ վարչախմբի հասցեին, հայտնվել են իրավապահների թիրախում։
Հակակոռուպցիոն դատարանում էլ արդեն 3 տասնյակից ավելի քրեական գործեր կան ընդդիմադիր տարբեր գործիչների դեմ, որոնց մեղադրում են հնարավոր բոլոր մեղքերի, կոռուպցիայի, կաշառակերության յուրացումների մեջ։ Քրեական գործեր են հարուցված թե՛ նախկին պաշտոնյաների, թե՛ նաև նրանց ընտանիքների անդամների դեմ։
Օրեր առաջ էլ քրեական մի գործ հարուցվել է Արցախի անվտանգության խորհրդի նախկին քարտուղար Վիտալի Բալասանյանի դեմ, որին մեղադրում են 25 միլիոն դրամ գումար հափշտակելու մեջ։ Դատախազությունն էլ հատուկ վերանայման բողոք է ներկայացրել վերաքննիչ քրեական դատարան՝ չհամակերպվելով գեներալ-մայոր Գրիգորի Խաչատուրովին ազատ արձակելու՝ առաջին ատյանի դատարանի որոշման հետ։
Մեր աղբյուրների փոխանցմամբ՝ առաջիկայում քրեական մի գործ էլ հարուցվելու է «Քաղպայմանագրի» պատգամավորներից մեկի դեմ։ Այս դրվագով գործող վարչախումբը փորձում է համոզել, թե երկակի ստանդարտներ չեն կիրառում քրեական գործեր հարուցելով։ Սակայն, խնդիրն այն է, որ քրեական գործը, որ հարուցելու են «քպ-ականի» դեմ, իրականում հենց Նիկոլ Փաշինյանի հստակ հանձնարարությամբ է։
Խոսքը ԱԺ պատգամավոր, պաշտպանության նախկին փոխնախարար Գագիկ Մելքոնյանի մասին է։ Վերջինիս դեմ բավականին լուրջ կոմպրոմատներ կան թե՛ նախկին իշխանությունների օրոք իր յուրացումների և թե՛ փաշինյանական իշխանության օրոք կատարած իրավախախտումների մասով։ Ավելին, Փաշինյանը հանձնարարել է նրա դեմ քրեական գործ հարուցել, քանի որ Մելքոնյանը նախ չի մասնակցել Սերյան Օհանյանին քրեական պատասխանատվության ենթարկելու քվեարկությանը, երկրորդն էլ՝ մի շարք դեպքերում հրաժարվել է կատարել Փաշինյանի ապօրինի հրահանգները, ուստի և որոշել է պատժել իրենց կուսակցին, մյուսներին ավելի վախեցնելու համար։
Անի Կարապետյան
