Ոստիկանները հին մեթոդներով փորձում են մանևրել

Երեկ՝ 2023 թվականի փետրվարի 9-ին, ՀՀ ոստիկանության մի խումբ ծառայողներ Ոստիկանության Երևան քաղաքի վարչության Էրեբունու բաժնում շարունակական բռնություն են կիրառել իրենց մասնագիտական գործունեությունն իրականացնող փաստաբաններ Մարզպետ Ավագյանի և Էմանուել Անանյանի նկատմամբ:

Մասնավորապես, ոստիկանության ծառայողները տևական ժամանակ ոտքերով և ձեռքերով հարվածել են փաստաբաններին՝ հայհոյանքներ հնչեցնելով նրանց հասցեին: Փաստաբաններից մեկին ոստիկանության ծառայողները բռնությամբ դուրս են բերել ոստիկանության բաժնից: 

Փաստաբանների պալատը ոստիկանների արածը որակում է աննախադեպ: Փաստաբանների գործառույթն օրենքի շրաջանակներում անձի պաշտպանությունն իրականացնելն է: Այս դեպքում ստացվում է, որ հենց իրենք պաշտպանության կարիք ունեն:

Այսօր նախաձեռնաված քրեական վարույթի շրջանակներում երկու փաստաբանն էլ տուժող են ճանաչվել: Էմանուել Անանյանը 1or.am֊ի հետ զրույցում ասաց, որ այսօր ենթարկվել է դատաբժշկական փորձաքննության, տեսանաելի վնասվածքներ ունի: «Ոստիկանների գործողություններն իմ կամ գործընկերոջս անձով պայմանվորված չէ: Այն ուղղված է ամբողջ փաստաբանական համայնքի գործունեության դեմ»,֊ նշեց նա: 

Մարզպետ Ավագյանի հետ կապ հաստատել չհաջողվեց: ՔԿ մամուլի խոսնակ Գոռ Աբրահամյանի ֆեյսբուքյան գրառումից տեղեկանում ենք, որ ի պատասխան փաստաբանների ներկայացրած հաղորդման, ոստիկանները ևս հաղորդում են ներկայացրել. «Միևնույն ժամանակ նաև ՀՀ ոստիկանության երկու աշխատակիցների կողմից հաղորդում է ստացվել քննչական բաժնում 2 փաստաբանների կողմից իրենց և ոստիկանության մյուս ծառայողների հասցեին սեռական բնույթի հայհոյանքներ հնչեցնելու, այդ ընթացքում դրսևորած բացահայտ արհամարհական վերաբերմունքի և բռնություն գործադրելու դեպքի վերաբերյալ»: 

Երկու  կողմի հաղորդումների հիման վրա հարուցվել է քրեական վարույթ:  Հետաքրքրական է, որ դատաբժշկական փորձաքննության ենթարկվել են միյան փաստաբանները, տուժողը ևս նրանք են: Այս դեպքում ոստիկանների հաղորդումը նման է հարձակողականությամբ պաշպանվելուն, որը իրավաբանության մեջ բավականին հնացած մեթոդ է: 

Բանն այն է, որ ԱԺ Մարդու իրավունքների պաշտպանության հանձնաժողովի նախագահ Թագուհի Թովմասյանը դեռ երեկ երեկոյան է հայտարարել, որ անչափասների նկատմամբ  բռնություն է կիրառվել և որ ինքն անձամբ տեսել է: Այս մասին քննչական կոմիտեն լռում է: Որևէ վարույթ նախաձեռնված չէ, իսկ լռության հետևանաքը այն է, որ հարցաքննությունն այսօր էլ չի կայացել,  քանի որ մի խումբ ոստիկանության աշխատողներ ներխուժել են հարցաքննության սենյակ և խաթարել հարցաքննության բնականոն ընթացքը: Այս մասին հայտնում է Թագուհի Թովմասյանը:

Երևույթին անդրադարձել են մի շարք իրավաբաններ և իրավապաշտպաններ: Հետաքրքիր է, որ լռում են իշխանության ներկայացուցիչները: Ուշագրավ է, որ այժմ ՆԳ նախարար Վահե Ղազարյանը անցյալ տարվա հուլիսի 25-ին միջազգային հանրության կողմից տրամադրված ու բաժիններում տեղադրված տեսախցիկների տեսագրությունը անջատելու մասին հրաման (թիվ 26-Լ) է տվել:

Աննա Ավետիսյան