Ռուբեն Վարդանյանը համամիտ չէ իշխանության սցենարի հետ

«Հայաստանի և Իրանի տարբեր հատվածներում մեր թշնամիները ցանկանում են տարբեր իրավիճակներ ստեղծել և պետության ղեկավարության ուշադրությունը շեղել այդ իրադարձությունների վրա։ Բայց դա չի բխում մեր շահերից, չի կարելի թույլ տալ նման իրավիճակների առաջացում»,- «Հայ-իրանական հարաբերությունները ընդհանուր շահերի համատեքստում» թեմայով քննարկման ժամանակ ասաց Հայաստանում Իրանի արտակարգ և լիազոր դեսպան Աբբաս Բադախշան Զոհուրին՝  ԶՄԼ-ին կոչ անելով զերծ մնալ հայ-իրանական ռազմական համագործակցության մասին, որևէ դրվագ հրապարակելուց:

Սրանից կարելի է առնվազն ենթադրել, որ համագործակցությունն իրապես առկա է և դրա կիրառման ժամկետները մոտ են: Բանն այն է, որ միայ Իրանը չէ, որ ակնարկում է ռազմական նոր էսկալացիայի մասին:

«Ռազմինֆո» կայքի հիմնադիր Կարեն Վրթանեսյանի խոսքով՝ նոր հարկաձման համար թե՛ քաղաքական և թե՛ ռազմական առումով ստեղծված են բոլոր բարենպաստ պայմանները: Մեկ այլ փորձագետ Վան Համբարձումյանն էլ հայտնում է, որ թշնամին Սյունիքի երկու կողմերում մեծ թվով ուժեր է կուտակել և կատարում է ամրաշինական աշխատանքներ: Սյունիքը երկկողմանի սեղմված է:  

Ալիևն էլ տարեսկզբին  հայտարարել էր, որ իրենց համար կարևորագույն ռազմավարական նշանակություն ունի այսպես կոչված Զանգեզուրի միջանցքը և անկախ հայկական կողմի համաձայնությունից այն բացվելու է 2023թ-ին: Սրան զուգահեռ իշխանական թիմի ներկայացուցիչները կրկին իրար հերթ չտալով խոսում են խաղաղության կարևորության մասին և ակնարկում, որ իրենք ու նաև հայկական բանակը չի պատրաստվում կռվել, բայց ԱԱԾ-ն բացահայտ հայտարարում է Հնդկաստանից զենքի և տեխնիկայի գնման մասին:

Այսինքն՝ Փաշինյանն ուզում է ասել, որ ինքը ևս զինվում է և խաղաղության պայմանագրում կետերի փոփոխությունը պետք է դիտարկել նաև այս կողմից: ԱԳ նախարարությունն էլ ամեն օր խոսում է խաղաղության պայմանագրից, ամեն հարմար առիթով հայտարարում է, որ Ադրբեջանի առաջարկներն իրենց համար ընդունելի են և այն պետք է արագ վերջանակետին հասցնել:

«Ձմեռ 2023» զորավարժությունների անցկացումն էլ չի խաթարել անգամ Թուրքիայի մեծաթիվ կյանքեր խլած ավերիչ երկրաշարժը: Թեև հայկական կողմն ամեն ինչ անում է, որ Թուրքիային հաճոյանալով հետաձգի ուժով Զանգեզուրի միջանցք բացելու գործընթացը, սակայն պատասխան հայտարարություններն այլ բանի մասին են վկայում:

Նախ Էրդողանն ասաց, որ 95 երկրից էլ օգություն են ընդունել, այսինքն՝ ով առաջարկել է, բոլորինն էլ ընդունել ենք և Հայաստանի մասին առանձին չխոսեց, բացի այդ նաև հայտարարեց, որ ինչպես իրենք էին 44-օրյա պատերազմի ժամանակ Ադրբեջանի կողքին, այնպես էլ այսօր հակառակն է տեղի ունենում, սրանով իսկ հասկացնելով, որ միջացքի թեման երկրաշարժի և հայ փրկարարների Թուրքիա մեկնելու հետ որևէ կապ չունի: 

Մի կողմից էլ ինչպես 44-օրյա պատերազմից առաջ, այնպես էլ հիմա, իշխանությունն ազատվում է ընդդիմադիր կարկառուն գործիչներից, որոնք նաև ռազմական գործի լավ մասնագետներ են, խոսքն այս անգամ ՊՆ նախկին նախարար Սեյրան Օհանյանի մասին է, ում ԱԺ-ում զրկեցին անձեռնմխելիությունից և պատրաստվում են կալանավորել: Այդ նույն ճակատագրին արժանացավ նաև Դավիթ Գալստայանը (Պատրոն Դավոն), ով նախկին իշխանությունների ժամանակ զբաղվում էր զենքի ներկրմամբ:

Բանակում էլ կրկին բարեփոխումներ են, ՊՆ-ում քննարկումներ են ընթանում, որ հետագայում կարողանան հայտարարել, թե էլի չհասցրեցին բանակի բարեփոխումներն ավարտին հասցնել, մոդուլային կացարաններ բերել, դավաճաններին պատժել ու ելակի մատակարարումը հասցնել բոլոր զորամասեր:

Իշխանության սցենարի հետ համամիտ չէ Արցախի պետնախարար Ռուբեն Վարդանյանը, ում նկատմամբ էլ ակտիվ հակաքարոզ է աշխատում:

Աննա Ավետիսյան