Դատական համակարգում, մեղծ ասած, անմխիթար իրավիճակ է

Արդարադատության նախարարությունն արդեն 4-րդ անգամ ցանկանում է կարգապահական պատասխանատվության ենթարկել դատավոր Զարուհի Նախշքարյանին: Այս անգամ կարգապահական վարույթ նախաձեռնելու հիմքը դատավորի հրապարակային խոսքն է, որով նա իր վերաբերմունքն է արտահայտել դատավոր Աննա Փիլոսյանի վերաբերյալ ԲԴԽ-ի կայացրած որոշման առնչությամբ:

Ըստ արդարադատության նախարարի՝ նա հրապարակայնորեն կասկածի տակ է առել դատավոր Փիլոսյանի վերաբերյալ ԲԴԽ դատական ակտը։  Այս վարույթը բացառիկ է նրանով, որ դեռևս որևէ այլ  վարույթով չարձանագրված խախտում է տեղի ունեցել:

Ստացվում է, որ Բարձրագույն դատական խորհուրդը քննելու է իր որոշումը կասկածի տակ դնելու մեջ «մեղադրվող» դատավորին կարգապահական պատասխանատվության ենթարկելու հարցը: Իհարկե, գործնականում հնարավոր չէ ստեղծել կարգապահական գործը քննող այլ դատարան, բայց անաչառությունը կասկածի տակ դնելու խնդիր կա: 

Նախշքարյանի նկատմամբ հարուցված նախկին երեք վարույթներից երկուսով արձանագրվել է խախտման բացակայություն, 3-րդ դեպքում արձանագրվել է խախտում և խիստ նկատողության կարգապահական միջոցի կիրառում:  

Անդրադառնալով այս վարույթին՝ դատավորի ներկայացուցիչ Ռուբեն Մելիքյանը նշել է. «Մենք արդեն իսկ ունենք իրավիճակ, որ դատավոր Նախշքարյանի դեպքում կա իրավունքների խախտում: Այդ մասով Եվրոպական դատարանը արդեն իսկ քննարկման առարկա է դարձրել այս գործը: Վարույթը վերաբերում է խոսքի ազատության խնդրին: Դատավորը մի շարք հրապարակումներում իր խիստ չափավոր մոտեցումներն է արտահայտել իր գործընկերոջ՝ դատավոր Աննա Փիլոսյանի նկատմամբ ԲԴԽ-ի կայացրած որոշման մասին: Դատավորները չեն կարող հնարավորություն չունենալ բարձրաձայնել իրենց վերաբերող խնդիրները»:

Այստեղ գերական ոչ թե իրավունքներն են, իրավական տեսանկյունից օրենքի տառի համապատասխանությունը, այլ՝ դատական համակարգում, մեղծ ասած, անմխիթար իրավիճակը: Այստեղ խնդիրն անձերն են:

Դեռ Գագիկ Ջհանգիրյանի ժամանակից ԲԴԽ թիրախում էր դատավոր Նախշքարյանը և այստեղ կարևոր է նաև, թե դատավորը ո՞ր գործընկերոջ մասին է խոսել: Դատավոր Աննա Փիլոսյանը Ռուբեն Մելիքյանի կինն է, ում, իր իսկ գնահատմամբ, ԲԴԽ-ն անարդար ձևով է աշխատանքից ազատել: Հատկանշական է, որ Մելիքյանն անարդար ձևով կնոջ աշխատանքային լիազորությունների դադարեցումը կապել էր իր հանրային գործունեության հետ: 

Հատկաշական է, որ դատավոր Զարուհի Նախշքարյանին ի աջակցություն՝ փաստաբանները «Ֆեյսբուքում» ֆլեշմոբ են կազմակերպել, որտեղ իրենց տեքստը սկսում են. «Պաշտպանում եմ դատավորի խոսքի ազատությունը…» նախադասությամբ և գտնում են, որ այս վարույթը  անարդար է  և ոչ իրավական:

Սա դատական համակարգի կաղալու մասին ևս մեկ ապասույց է: Դե, իհարկե, կա՞  դատավոր, որ գլխավոր գերագույն հրամանատարի ասածին կարող է ոչ ասել: Ո՛չ, չկա, և ով փորձում է՝ անձնական օրինակով համոզվում է դրանում:

Աննա Ավետիսյան