Սերժ Սարգսյանն այս քայլով Սեյրան Օհանյանին հասկացնում էր, որ թեև համաձայն չէ իշխանության հետ, սակայն իրենց մեջ էլ ամեն ինչ հարթ չէ

Սեյրան Օհանյանի նկատմամբ քրեական հետապնդում հարուցելու մասին Ազգային ժողովը տվեց իր համաձայնությունը, ինչը և սպասելի էր:

Գլխավոր դատախազ Աննա Վարդապետյանը 3 միջնորդություն էր ներկայացրել  Սեյրան Օհանյանի նկատմամբ քրեական հետապնդում հարուցելուն համաձայնություն տալու համար: Միջնորդություններից մեկը քննարկվել է դռնփակ ռեժիմով, երկուսը՝ դռնբաց: Առաջին միջնորդությանը 107 պատգամավորներից քվեարկությանը մասնակցել են 68-ը: Կողմ է քվեարկել 68 պատգամավոր, դեմ քվերակող պատգամավոր չի եղել: 2-րդ միջնորդությանը 107 պատգամավորներից մասնակցել է 66 պատգամավոր, կողմ են քվեարկել 66-ը: 3-րդին 107  պատգամավորներից մասնակցել են 68-ը, կողմ է քվեարկել 68 պատգամավոր: 

Ուշագրավ էր, որ միջնորդության քննությանը չէր մասնակցում «Հայաստան» դաշինքը՝ հայտարարելով, որ կրկին բոյկոտում է: Ոչ  վաղ անցյալում, «Հայաստան» և «Պատիվ ունեմ» խմբակցությունները նիստերը բոյկոտում էին միասին, փողոց էին դուրս գալիս միասին, սակայն ասյօր «Պատիվ ունեմ» խմբակցությունը մասնակցում էր նիստին, սակայն քվեարկությանը՝ ոչ: Նրանք այնտեղ էին ուղղակի դահլիճում ներկայություն ապահովելու համար: Բանն այն է, որ ոչ մի հարց չտվեցին, ելույթ չունեցան, չարձագանքեցին նույնիսկ ամենաանհեթեթ ելույթներին և ձևակերպումներին:

Ամենայն հավանականությամբ, սա Սերժ Սարգսյանի պատասխանն էր Սերյան Օհանյանին 2017թ-ին ընդդիմադիր ճամբարից հանդես գալու համար: Օհանյանը 2017 թ. խորհրդարանական ընտրությունների ժամանակ հանդես էր գալիս «Օհանյան-Րաֆֆի-Օսկանյան» դաշինքով:

Սերժ Ազատիչն իր խմբակցության այդ նիստի ներկայությամբ, ամենայն հավանականությամբ, հասկացնում էր, որ թեև համաձայն չէ իշխանության հետ, սակայն իրենց մեջ էլ ամեն ինչ հարթ չէ: 

Աննա Ավետիսյան