Թուրքիան վերջին օրերին լրջորեն ավելացրել է ճնշումը Հայաստանի վրա
ՎԵՐԼՈՒԾՈՒԹՅՈՒՆՆԵՐ
Թուրքիան վերջին օրերին լրջորեն ավելացրել է ճնշումը Հայաստանի վրա։ Առանցքային մի քանի պաշտոնյաներ մեկը մյուսի ետևից, իրար հերթ չտալով՝ Հայաստանին մեկ քննադատում են, մեկ ճնշումներ գործադրում, մեկ «փշի-փշի անում», իսկ Թուրքիայի հիմնական և գլխավոր ուզածը դա հենց «Զանգեզուրի ճանապարհն» է։ «Հայաստանը պետք է սեղմի Ադրբեջանի և Թուրքիայի նախագահների պարզած խաղաղության ձեռքը,- հայտարարել է Թուրքիայի Պաշտպանության նախարար Հուլուսի Աքքարը։ Ըստ նրա, արտաքին ազդեցությամբ պայմանավորված՝ երազներում մնալ տրամաբանական մոտեցում չէ, մենք ցանկանում ենք, որ Հայաստանն օգտվի այս հնարավորությունից»,- ասել է Աքքարը։ Նա նշել է այսպես կոչված Զանգեզուրի միջանցքը, որը թուրքական կողմը ձևակերպում է որպես միջին միջանցք անունով, և Աքքարը նշում է, թե Հայաստանը այդ միջանցքի հարցը շարունակ մերժում է և դրանով անցնող երկաթուղիներն ու ճանապարհներն արժեքավոր են տարածաշրջանի տնտեսական, սոցիալական կյանքի, անվտանգության տեսանկյունից։
Նախօրեին էլ Հարավային Կովկասում խաղաղության և կայունություն ստեղծելու հնարավորության ստեղծման մասին հայտարարել էր Թուրքիայի արտգործնախարար Մեվլութ Չավուշողլուն՝ նշելով, թե այդպիսի հնարավորություն ստեղծել է ղարաբաղյան պատերազմից հետո։ Արգենտինայի արտգործնախարարի հետ մամուլի ասուլիսում Չավուշoղլուն հայտարարել է, թե քայլեր են ձեռնարկվել Թուրքիայի և Հայաստանի, Ադրբեջանի և Հայաստանի միջև հարաբերությունների կարգավորման ուղղությամբ։ Նա հայտարարել է, որ Անկարայի նպատակն է Հարավային Կովկասը դարձնել կայունության և զարգացման տարածաշրջան, նշել, թե Թուրքիան ու Ադրբեջանն իբր անկեղծ են տրամադրված այդ ուղղությամբ։ Թուրքական կողմի վերջին շրջանի ակտիվացումը վկայում է, որ Թուրքիան ինքն էլ շտապում է կարգավորել հարաբերությունները Հայաստանի նկատմամբ, հնարավորություն ստեղծել իր քաղաքական ու տնտեսական էքսպանսիայի համար, ինչպես նաև իրականություն դարձնել Զանգեզուրի միջանցքի՝ Հայաստանի համար աղետալի նախագծի իրականացումը։ Եթե միայն տնտեսական և քաղաքական խնդիրներով հարցը պայմանավորված լիներ, ապա նշենք, որ տարվա սկզբից արդեն օդային բեռափոխադրումների հնարավորությունը բացված է երկու երկրների համար, բայց մինչ օրս որևէ ինքնաթիռ Հայաստան չի իջել Թուրքիայից որևէ բեռով, ինչը վկայում է, որ խնդիրն ամենևին էլ հարցերը փուլ առ փուլ լուծելը չէ, Թուրքիան ցանկանում է ամեն ինչ ստանալ միանգամից և Նիկոլ Փաշինյանի ձեռքով։
Մերի Միսակյան
