Ռուսաստանը սպառնում է Հայաստանին՝ ԵՄ առաքելության պատճառով

Հայաստանում Եվրամիության քաղաքացիական նոր առաքելություն ստեղծելու որոշումը ոչ միայն լրջորեն մտահոգել է Ռուսաստանին, այլ նաև Ռուսաստանի ԱԳՆ–ն անցել է բացահայտ սպառնալիքների։ Տարածած հաղորդագրության մեջ ռուսական կողմն ընդգծում է, թե եվրոպական ներկայությունը Հայաստանում ավելի հավակնոտ է լինելու, քան մոնիթորինգի մեխանիզմը, որը Հայաստանում գործել է անցյալ տարվա հոկտեմբերից դեկտեմբեր ամիսներին։

«Եթե Բրյուսելն անկեղծորեն շահագրգռված լիներ Անդրկովկասում խաղաղությամբ, ապա նրանք Ադրբեջանի հետ կհամաձայնեցնեին իրենց առաքելության պայմանները»,- ասվում է Ռուսաստանի ԱԳն հայտարարության մեջ, նշվում է, թե Եվրամիության դիտորդների հայտնվելը կարող է միայն աշխարհաքաղաքական առճակատում բերել տարածաշրջան և սրել հակասությունները։ Ռուսական կողմը նաև ընդգծել է, որ Երևանում առանց տրամաբանական ավարտին հասցնելու ՀԱՊԿ առաքելության ուղղությամբ աշխատանքները գերադասել են ընտրություն կատարել հօգուտ ԵՄ-ի։ «Եթե հայ դաշնակիցները շահագրգռված մնան օգտագործելու ՀԱՊԿ ներուժը, ապա այդ առաքելությունը կարող է արագ տեղակայվել Հայաստանում»,- ասվում է հայտարարության մեջ։

44-օրյա պատերազմի ընթացքում և դրանից հետո Հայաստանը բազմիցս է մեղադրանքներ հասցեագրել ՀԱՊԿ-ին՝ բավարար չափով իր պարտավորությունները չկատարելու, ինչպես նաև հայկական կողմի խնդրանքները մերժելու վերաբերյալ, իսկ ՀԱՊԿ ղեկավարների վերջին նիստում Հայաստանն ընդհանրապես հայկական կողմի խնդրանքը մերժեցին, և Նիկոլ Փաշինյանը ստիպված էր հրաժարվել ամփոփիչ փաստաթուղթը ստորագրելուց, այդուհանդերձ հասկանալի էր, որ ՀԱՊԿ-ի դեմ Հայաստանի ցանկացած գործողություն Ռուսաստանը չափազանց ծանր է ընդունելու, իսկ արդեն Եվրամիության 100-ից ավելի դիտորդներին Հայաստանում տեղակայելը Ռուսաստանը դիտարկում է որպես իր անձնական շահերին հասցված հարված, ուստի և առայժմ միայն սպառնում է, սակայն չի բացառվում նաև համապատասխան գործողությունների անցնել՝ ընդհուպ Հայաստանում ներքաղաքական իրավիճակի սրումը։ 

Թերևս Փաշինյանը լուրջ երաշխիքներ է ստացել իր արևմտյան հովանավորներից, որ նման զարգացումների դեպքում կաջակցեն իրեն, կամ կկանխեն ռուսական ներկայությունը, հատկապես հաշվի առնելով հակառուսական տրամադրությունների աճը, դժվար թե Հայաստանում ռուսները կարողանան նախկինի պես սրել իրավիճակը, սակայն ցանկացած նման սրում հղի է լրջագույն վտանգներով առաջին հերթին Հայաստանի Հանրապետության համար։

Անի Թումանյան