Հայաստանի խորհրդարանը կորցրել է իրականության զգացումը

Ազգային ժողովում շարունակվում է հերթական քառօրյան, իսկ քննարկումների որակը գալիս է ապացուցելու, որ փաշինյանական իշխանությունը նոր սադրանք է մտմտում՝ ընդիմությանը հերթական անգամ հարվածելու համար։

Ամիսներ շարունակ, բոյկոտից հետո, «Հայաստան» և «Պատիվ ունեմ» խմբակցությունները վերադարձան խորհրդարան, ինչն իհարկե որևէ կերպ դրական չազդեց նրանց հեղինակության և վարքի վրա, այժմ էլ փաշինյանական իշխանությունը փորձում է նոր սադրանքների մեջ ներքաշել, իսկ մեկ-երկուսին էլ զրկել մանդատից։

Թեև անցած շաբաթ կայացած ԱԺ խորհրդի նիստում այդպես էլ որոշում չկայացվեց, իսկ «Քաղաքացիական պայմանագիրը» ընդհանուր որոշում ունի չզրկել 22 պատգամավորներին, այդուհանդերձ լուրեր են շրջանառվում, որ մեկ-երկու պատգամավորների կարող են զրկել մանդատից, մյուսների աչքը վախեցնելու համար։

Մանդատից զրկվելու գլխավոր հավակնորդը Իշխան Սաղաթելյանն է, թեև որպեսզի կողմնապահություն չդիտվի, նրա հետ ևս մեկ-երկու պատգամավորների կզրկեն մանդատից։ Ինչևէ, ընդդիմությունը հայտարարել է, թե մանդատներից զրկելն իրենց համար ինքնանպատակ չեն, մտադիր չեն տրվելու իշխանության սպառնալիքներին, շարունակելու են առաջնորդվել իրենց օրակարգով, իսկ օրակարգ, թերևս կարելի է արձանագրել, որ չկա։

Հաշվի չառնելով թե՛ Լաչինի միջանցքի փակումը և թե՛ ստեղծված իրավիճակը, ո՛չ իշխանությունը և ո՛չ էլ խորհրդարանական ընդդիմությունը որևէ օրակարգ չունեն երկիրը ստեղծված իրավիճակից դուրս բերելու համար, փոխարենը կրկին միմյանց մեղադրում են «նախկին-ներկա», «սև-սպիտակ» թեզերով, ինչն իհարկե, որևէ կերպ չի նպաստում Հայաստանում քաղաքական ճգնաժամի հանգուցալուծմանը։

Մինաս Ազատյան