Ինչո՞ւ Մացոն զրկվեց հակակոռուպցիոն դատավոր դառնալու շանսից
ՎԵՐԼՈՒԾՈՒԹՅՈՒՆՆԵՐ
Տխրահռչակ դատավոր Մնացական Մարտիրոսյանի թեկնածությունը հակակոռուպցիոն դատարանի դատավորի պաշտոնում առաջադրելու որոշումը հարուցել էր ոչ միայն քաղհասարակության, ընդդիմության և հանրության դժգոհությունը, այլ նույնիսկ փաշինյանական վարչախմբի ներսում լուրջ խլրտումներ էին սկսվել։
Այնքան, որ նույնիսկ Նիկոլ Փաշինյանը չկարողացավ պաշտպանել նախկինում իրեն ազատազրկման դատապարտած, իսկ «հեղափոխությունից» հետո իր բոլոր քմահաճույքները կատարող վայ-դատավորին, հարկադրված եղավ նրան հեռացնել տալ դատավորի թեկնածուների ցուցակից։
Քաղաքական աղմկահարույց գործերով հայտնի Մացոն երկու տասնամյակից ավելի բոլոր իշխանությւոնների օրոք ինքնուրույնության և անկախության որևէ նշույլ չի ցուցադրել, առանց աչքը թարթելու դատել է անխտիր բոլորին։ Նրա վճռով են ազատազրկում կրել Նիկոլ Փաշինյանն ու Գագիկ Ջհանգիրյանի եղբայրը, «7-ի գործով» անցնող քաղբանտարկյալները, Շանթ Հարությունյանը։
Հետագայում Հայաստանի Հանրապետությունը զգալի միջոցներ է վատնել՝ ՄԻԵԴ վճիռները կատարելու համար, իսկ Հայաստանի հեղինակությանը Մնացական Մարտիրոսյանի հասցրած վնասը չափազանց մեծ է եղել։
Այսօր էլ Մարտիրոսյանը դատում է օրվա ընդդիմությանը. Ավետիք Չալաբյանին, Աղվան Հովսեփյանին և այլ ընդդիմադիրների տևական ժամանակ կալանքի տակ էին պահում հենց Մարտիրոսյանի վճռով, իսկ պրոդյուսեր Արմեն Գրիգորյանը մահացավ դատական նիստի ընթացքում։
2018 թվականից հետո թվում էր՝ փաշինյանականները կմաքրեն արդարադատության համակարգը, կհեռացնեն թե՛ Մացոյին, թե՛ մյուս կամակատար դատավորներին, սակայն պարզվեց՝ Նիկոլ Փաշինյանը բնավ նման ցանկություն չունի, նրան էլ պետք են այսպիսի դատավորներ, որ հիմա էլ իր քմահաճույքները կատարեն։
Եվ Մարտիրոսյանն այս առումով լիովին «արդարացնում» է իր վրա դրված կեղտոտ առաքելությունը։ Հակակոռուպցիոն դատարանի դատավորի պաշտոնում Մարտիրոսյանի թեկնածության առաջադրումը, կարելի է ասել, ցնցեց իշխանության հիմքերը։
Քաղհասարակությունն աներկբա խռովություն բարձրացրեց՝ պահանջելով Մնացական Մարտիրոսյանի անունը հանել թեկնածուների ցուցակից։ Անգամ գործող վարչախմբի բազմաթիվ ներկայացուցիչներ հրապարակային քննադատություն հնչեցրին՝ հիշեցնելով Մացոյի անփառունակ անցյալը։
Տխրահռչակ դատավորի համար քննադատություններն անսպասելի չէին։ «Ես ձգտել եմ ընդգրկվել ՀՀ Հակակոռուպցիոն դատարանի դատավորների ցանկում՝ անկախ մամուլի հրապարակումներից ու դատական ակտերի բեկանումներից։ Ինձ համար սպասելի են եղել կոռուպցիոն հանցագործությունների քննություն իրականացնող դատավորների ցանկում ընդգրկվելու վերաբերյալ հնարավոր քննադատությունները»,- ասել էր նա։
«Քաղաքացիական պայմանագիրը», մեր տեղեկություններով, նույնիսկ առանձին նիստ է գումարել, որտեղ իշխանականներից շատերը նշել են, թե այդ նշանակումը կարող է լուրջ խնդիրներ հարուցել։ Ի վերջո, Մարտիրոսյանն իր ձեռքով դիմում գրեց և հրաժարվեց հակակոռուպցիոն դատարանի դատավորի թեկնածությունից, թեև իշխանական կուլիսներում շշուկներ կային, որ Փաշինյանն անձամբ է նրան խոստացել հակակոռուպցիոն դատարանի նախագահի պաշտոնը։
Վարչապետի պաշտոնը զբաղեցնող անձը, իհարկե, որևէ մտադրություն չունի բարեփոխելու արդարադատության համակարգը, նրան տարատեսակ «մացոներ. են պետք՝ ընդդիմախոսներին զսպելու, բռնաճնշումների ենթարկելու համար, ուստի և հակակոռուպցիոն դատարանում այլ, դեռ քիչ հայտնի կամակատարների կնշանակեն, իսկ Մնացական Մարտիրոսյանը կշարունակի նոր անարդար վճիռներ երկնել Երևանի ընդհանուր իրավասության դատարանում՝ «Հանուն Նիկոլ Փաշինյանի»։
Մանե Մսրյան
