Ի՞նչ աղետ է գուժում Արցախի Անվտանգության խորհուրդը
ՎԵՐԼՈՒԾՈՒԹՅՈՒՆՆԵՐ
Հայաստանի վարչապետի նախօրեին տեղի ունեցած ասուլիսի ընթացքում հնչեցրած մի շարք պնդումներ և տեսակետներ առաջացրել են մտահոգություններ, քանի որ չեն համապատասխանում ինչպես համազգային պայքարի գաղափարներին, այնպես էլ Արցախի Հանրապետության բնակչության և իշխանությունների որդեգրած դիրքորոշմանը։
Այս մասին ասվում է Արցախի անվտանգության խորհրդի՝ երեկ տարածած հայտարության մեջ։ Նախագահ Արայիկ Հարությունյանի գլխավորությամբ անվտանգության խորհրդի գումարված նիստից հետո տարածած հայտարարությունը բավական մտահոգիչ է։ Մասնավորապես նշվում է. «Մենք գիտակցում ենք բոլոր այն հետևանքները, որոնք բխում են մեր որդեգրած քաղաքական գծից և վերահաստատում ենք մեր դիրքորոշումը առ այն, որ Արցախի ինքնիշխանությունը և պատմական հայրենիքում ազատ և անկախ ապրելու իրավունքը բացարձակ արժեքներ են, որևէ պարտադրանք կամ սպառնալիք չի կարող մեզ հետ պահել պայքարը շարունակելու մեր կայացրած որոշումից»։
Ըստ էության, Արցախի իշխանությունները չեն նշում, թե որոնք են այն հետևանքները, որոնք կարող են բխել իրենց որդեգրած քաղաքական գծից, հերթական անգամ տարակուսանքի մեջ թողնելով թե՛ Արցախի բնակչությանը և թե՛ Հայաստանի քաղաքական ու փորձագիտական դաշտին։
Բնական է, որ արմատական դիրքորոշում ընդունելու Արցախի իշխանությունների որոշումը լրջագույն հետևանքներ կարող է ունենալ, հատկապես հաշվի առնելով, թե՛ Հայաստանի և թե՛ Արցախի ունեցած ռեսուրսները, մարտունակությունը, ինչպես նաև ձևավորված աշխարհաքաղաքական համակարգը։
Արցախի անվտանգության խորհուրդը դիմել է միջազգային հանրությանը՝ Ադրբեջանի կողմից ձեռնարկված ահաբեկչական գործողությունները, ծրագրված էթնիկ զտումների և նախապատրաստվող նոր ցեղասպանությունը կանխելու համար պատասխանատվություն ստանձնելու կոչով։
Թերևս առաջին անգամը չէ, երբ Արցախից հերքում են Նիկոլ Փաշինյանի հայտարությունները, սակայն կոնկրետ այս հայտարարությունը բավական մտահոգիչ շերտեր է պարունակում։ Թերևս հենց Հայաստանի և Արցախի բնակիչներն իրենք պետք է պահանջեն Արցախի իշխանություններից բացահայտելու իրենց իսկ մատնանշած հետևանքները։
Մանե Մսրյան
