Նիկոլ Փաշինյանը մասնատում է հատուկ ծառայությունները․ չի վստահում

Նիկոլ Փաշինյանն առանձնապես չի վստահում Հայաստանի Ազգային անվտանգության ծառայությանը և փորձում է մասնատել՝ այդ կերպ նվազեցնելով թե՛ ԱԱԾ պետի, թե՚ նրա աշխատակիցների ազդեցությունը Հայաստանի վրա։ Կառավարությունը երեկ հաստատել է «Արտաքին հետախուզական գործունեության և արտաքին հետախուզության ծառայության մասին» օրենքի նախագիծը, որն առաջիկայում ուղարկվելու է Խորհրդարան։

Ներկայացրած փաթեթով առաջարկվում է ստեղծել նոր, արտաքին հետախուզության ծառայություն՝ որպես վարչապետին ենթակա պետական կառավարման մարմին։ Ընդ որում փաթեթից տպավորություն է, թե գործող վարչախումբը բացարձակապես չի պատկերացնում, թե ինչ է արտաքին հետախուզությունը և ինչպես պետք է այն իրականացնել։

Ըստ էության, առաջարկվում է ոչ միայն զինվորական ծառայության, այլ քաղաքացիական ծառայության պես դարձնել այն, որտեղ կարող են ընդունել բոլոր ընդունակ ուժերին, իսկ աշխատանքը լինելու է թափանցիկ։ Թերևս արտաքին հետախուզությունը այն ոլորտն է, որտեղ թափանցիկությունը ոչ միայն ողջունելի չէ, այլ նաև խիստ դատապարտելի է։

Արտաքին հետախուզությունը հանելով ԱԱԾ կազմից՝ Փաշինյանը նաև ԱԱԾ կազմից հանում է Պետական պահպանության ծառայությունը։ Ազգային ժողովի պաշտպանության և անվտանգության հարցերի մշտական հանձնաժողովի արտահերթ նիստում քննարկվել է օրենսդրական նախագծերի փաթեթը, որով նախատեսվում է, որ Պետական պահպանության ծառայությունը ևս կլինի առանձին, կրկին վարչապետին ենթակա։ Պետական պահպանության ծառայությունը իրականացնում է պետական բարձրաստիճան պաշտոնյաների, նախկին նախագահների և վարչապետների պահպանությունը։ Անմիջականորեն պատասխանատու է հենց անձամբ Նիկոլ Փաշինյանի անձնական պահպանության համար։

ԱԱԾ կազմում գործող այդ ծառայությունն առայժմ ղեկավարում է Փաշինյանի մերձավորագույն անձանցից մեկը՝ նրանից գեներալի ուսադիրներ ստացած Սարգիս Հովհաննիսյանը։ Վերջինս բազմաթիվ անգամներ հայտնվել է մամուլի ուշադրության կենտրոնում, լրագրողներին աքացի տալու և այլ աղմկահարույց դեպքերով։ Նաև անձամբ էր ղեկավարում Ազգային ժողովում ընդդիմադիր պատգամավորների վրա հարձակումը։

Այս կերպ Փաշինյանը նախ փորձում է վարձահատույց լինել իր մերձավորներին, նրանց առանձին ծառայությունների ղեկավարներ դարձնելով, մյուս կողմից էլ՝ նվազեցնել Ազգային անվտանգության ծառայության ազդեցությունը, ինչը վկայում է, որ Փաշինյանը լուրջ կասկածներ ունի ԱԱԾ գործող պետ Արմեն Աբազյանի նկատմամբ։

Արմեն Մադաթյան