Խոնարհ հարսի պես․ Ռուսաստանի հետ հարաբերություններում Փաշինյանի ինքնասիրության հետքն էլ չի մնացել
ՎԵՐԼՈՒԾՈՒԹՅՈՒՆՆԵՐ
Մինչև քառօրյա պատերազմը Հայաստանի իշխանությունների վարքը Ռուսաստանի հետ հարաբերություններում գրեթե արհամարհական էր, իսկ Նիկոլ Փաշինյանի իշխանության տարբեր ներկայացուցիչներ առիթը բաց չէին թողնում իրենց տարանջատելու Ռուսաստանից։ ՌԴ նախագահին այցերից մեկի ժամանակ Երևանում դիմավորել էր փոխարտգործնախարար Ռուբեն Ռուբինյանը, իսկ 2019 թվականին էլ Նիկոլ Փաշինյանը նույնիսկ չէր իջել նախագահականի դռների մոտ ՝ դիմավորելու ՌԴ նախագահին։
Երեկ, կարելի է ասել, լրիվ հակառակն էր, և պահանջվեց սարսափելի մի պատերազմ ու 4000-ից ավելի զոհեր, որպեսզի Նիկոլ Փաշինյանը գերտերության հետ հարաբերվելիս իրեն պահի ամենախեղճացած ձևով։ ՀԱՊԿ հավաքական անվտանգության խորհրդի նիստին ժամանող երկրների առաջնորդներին «Զվարթնոց» օդանավակայանում երեկ դիմավորում էր Մհեր Գրիգորյանը, այդ թվում Ղազախստանի, Բելառուսի, Ղրղստանի և Տաջիկստանի նախագահներին։
Վլադիմիր Պուտինին դիմավորելու համար օդանավակայան էր վազել Նիկոլ Փաշինյանը, որը նույնիսկ նրա հետ նույն մեքենայով է ժամանել գագաթնաժոովի վայր, իսկ արդեն տեղում Փաշինյանը չափազանց մեղմ է արտահայտվել ՀԱՊԿ-ի վերաբերյալ՝ հայտարարել, թե ՀԱՊԿ-ից որևէ արձագանք չեն ստացել Ադրբեջանի ագրեսիայի վերաբերյալ, ինչը մեծ հարված է հասցնում դաշինքի իմիջին։ Նշենք, որ ի տարբերություն շաբաթներ առաջ ՀԱՊԿ-ի վերաբերյալ Փաշինյանի հայտարարությունների՝ այս անգամ քննադատությունները չափազանց մեղմ էին, գրեթե Ռուսաստանի իշխանությունների սրտով։ Փաշինյանը չհամարձակվեց նույնիսկ իր դժգոհությունը հայտնել Բելառուսի նախագահին, ով բավականին ծաղրանքով էր խոսել նույն Փաշինյանի մասին և հայտարարել, թե իրենք մտադիր չեն գործարկել ՀԱՊԿ–ն Հայաստանին օգնելու համար։
Երեկ էլ, արտգործնախարարների նիստի ժամանակ նույնիսկ մեկ անգամ ձայնը միացրել էր և լսվել էր, թե ինչպես է ՌԴ արտգործնախարար Սերգեյ Լավրովն առաջարկում առկախել Հայաստանին օգնելու ՀԱՊԿ-ի պարտավորությունները։ Որևէ արձագանք արտգործնախարար Արարատ Միրզոյանից չի ստացել։
Ըստ էության, մի կողմից արևմտամետ քաղաքական ուժերին հրահրելով ՌԴ նախագահի դեմ բողոքի ակցիաներ անել, մյուս կողմից էլ նույն Փաշինյանը իրեն պահում է չափազանց խեղճացած։ Իսկ թե ինչ են քննարկել Վլադիմիր Պուտինն ու Փաշինյանն առանձին, առայժմ մեր աղբյուրները լռում են։
Սոնա Ավագյան
