Արևմուտքը փորձում է կարգավորման գործընթացը փախցնել Ռուսաստանի ձեռքից

Հայաստանի վարչապետի աթոռը զբաղեցնող Նիկոլ Փաշինյանը երեկ Խորհրդարանում հարց ու պատասխանի ժամանակ հաստատել է Սոչիի եռակողմ հանդիպմանը իր մասնակցությունը։ Փաշինյանը նշել է, թե Ռուսաստանի Դաշնության նախագահի կողմից առկա է հրավեր՝ հոկտեմբերի 31-ին Սոչիում անցկացնել եռակողմ հանդիպում։

«Ես հաստատել եմ իմ մասնակցությունը, անկեղծ ասած տեղեկություն չունեմ, թե ադրբեջանական կողմը հաստատել է իր մասնակցությունը, թե՝ ոչ»,- ասել է Փաշինյանը։

Ըստ էության, «1or.am»-ի՝ դեռևս օրեր առաջ ներկայացված տեղեկությունը, լիովին հաստատվել է։ Փաշինյանը Սոչի է մեկնելու իր համար չափազանց անբարենպաստ պայմաններում։ Հայաստանի գործող իշխանությունների հակառուսական քաղաքականության, ռուսաստանաբնակ հայտնի գործիչներին Հայաստան մուտքի արգելքների և ռուսական իշխանությունների դեմ ակնհայտ դեմարշի պայմաններում՝ վերլուծաբանները չեն բացառում, որ Փաշինյանին լրջագույն փորձություն է սպասվում՝ չի բացառվում՝ ընդհուպ պարտադրեն հրաժարվել իշխանությունից։

Այս պայմաններում չափազանց ուշագրավ է, որ նախօրեին ծածուկ Ռուսաստան է մեկնել նաև Արցախի նախագահ Արայիկ Հարությունյանը՝ Երևան-Մոսկվա չվերթի բիզնես դասով։ Ինքնաթիռում գտնվող անձանց հետ Հարությունյանը չի շփվել և շատ արագ հեռացել է ինքնաթիռից։ Թե ինչ նպատակով է Արցախի նախագահը մեկնել և ինչ շրջանակների հետ է հանդիպելու, դեռևս տեղեկություն չկա։ Ռուբեն Վարդանյանի ՝ Արցախի պետնախարարի պաշտոնը ստանձնելուց հետո, Հարությունյանը իր հետագա պաշտոնավարման հարցերը ճշգրտելու խնդիր ունի։

Սոչիում կայանալիք հանդիպմանն ընդառաջ՝ չափազանց ակտիվացել են նաև Միացյալ Նահանգները։ Նախօրեին պետքարտուղարության խոսնակ Նեդ Փրայսը հայտարարել է, թե Հայաստանն ու Ադրբեջանը պետք է որոշեն օգտակար է արդյո՞ք Ռուսաստանի նախագահի հրավերը։ Երեկ երեկոյան էլ խոսնակի առաջին տեղակալ՝ Վեդանտ Պատելը, հայտարարել է, թե Վաշինգտոնը վերստին խրախուսում է Հայաստանի և Ադրբեջանի ղեկավարներին ՝ հանդիպել այն ձևավաչափով, որն առավել օգտակար է իրենց, միևնույն ժամանակ շեշտում է՝ ուղղակի երկխոսությունն առանցքային է խնդիրների լուծման և կայուն խաղաղության հասնելու համար։

Պատելի այս դիտարկումը վկայում է, որ Միացյալ Նահանգները փորձում են Հայաստանին և Ադրբեջանին բանակցությունների սեղանին նստեցնել, առնվազն առանց Ռուսաստանի մասնակցության կամ էլ բացառապես Արևմուտքի ջատագովությամբ։ Ինչպես նշում են ռուսաստանցի վերլուծաբանները, Արևմուտքը փորձում է փախցնել կարգավորման գործընթացը Մոսկվայի ձեռքից։

Վարդան Մսրյան