Ինչի՞ց է վախենում «Քաղաքացիական պայմանագիրը»

«Քաղաքացիական պայմանագիր» կուսակցության հոկտեմբերի 29-ին նախանշված համագումարը փակ է լինելու լրատվամիջոցների համար։ Իշխող խմբակցությունից հայտնել են, թե համագումարը միայն կհեռարձակվի ուղիղ եթերում։ Լրագրողներին թույլ չեն տալու ներկա գտնվելու ո՛չ սրահում, ո՛չ էլ տեղում լուսաբանել կատարվող իրադարձությունները։ Փաստը, որ Հայաստանի իշխող քաղաքական ուժը նման կարգով է անցկացնում իր համագումարը, ինքնին արդեն աննախադեպ է։ Նախկինում որևէ իշխող ուժ իր համագումարը փակ չէր արել, իսկ իշխանության ներկայացուցիչները լրագրողներից խուսափելու առիթներ չեն ունեցել։

Ամենայն հավանականության «Քաղաքացիական պայմանագիր» -ում վախենում են, թե լրագրողները կարող են անցանկալի հարցեր տալ իրենց, պարզել, թե ինչ է իրականում կատարվում փաշինյանական կուսակցության շարքերում։ «Քաղպայմանագիրը» հոկտեմբերի 29-ին պետք է ընտրի կուսակցության 15 հոգանոց նոր վարչություն՝ 48 թեկնածուներից։

Ինչպես ավելի վաղ նշել ենք, ՔՊ-ում բավականին լուրջ պայքար է ընթանում վարչության անդամ դառնալու համար, հատկապես իշխող ուժում ձևավորված կլանների պարագայում, ազդեցիկ դեմքերը փորձում են իրենց սեփական կողմնակիցներին տեղավորել վարչությունում, նախ սեփական ազդեցությունը իշխանության ներսում ավելացնելու, ապա և՝ հնարավորության դեպքում Փաշինյանին այլընտրանք դառնալու, մասնակի իշխանափոխության պարագայում իշխանությունը իրենք, այլ ոչ թե այլ մրցակից վերցնելու։

Նախօրեին տեղեկություն հայտնվեց, թե Նիկոլ Փաշինյանը կուսակցականներին հրահանգել է հնարավորինս քիչ շփվել լրագրողների հետ, բացառությամբ մեկ-երկու անձանց, որոնց մոտեցումների հետ կապված Փաշինյանն անձամբ խնդիր չի տեսնում, կամ էլ չի կարող վերահսկել, մյուսներին փաստացի հրահանգվել է հնարավորինս զերծ մնալ լրագրողների հետ շփումներից ՝ «չբլթացնել», որպեսզի չբարդացնեն առանց այն էլ չափազանց բարդ իրավիճակը։

Ըստ էության, լրագրողները չեն կարողանա հայտնվել Մարզահամերգային համալիրում և հարցեր ուղղել ՔՊ-ական պաշտոնյաներին ու պատգամավորներին։

Ելենա Գուլքանյան