Ինչո՞ւ է Փաշինյանն արգելել Զատուլինի մուտքը Հայաստան

Ռուսաստանի դաշնության պետդումայի պատգամավոր, հայամետ գործիչ Կոնստանտին Զատուլինի այցը համարվել է անցանկալի։ Զատուլինն այդ մասին գրել է տելեգրամում՝ հրապարակելով Հայաստանի Ազգային ժողովի նամակը։

Մինչ այդ, Նիկոլ Փաշինյանի ընտանիքին պատկանող «Հայկական ժամանակն» էր տարածել տեղեկությունը։ Ազգային ժողովի ուղարկված նամակում մասնավորապես ասվում է. «ՀՀ Ազգային ժողովի ղեկավարության անունից հայտնում ենք, որ ցավոք, Հայաստանի Հանրապետության մասին Ձեր վերջին շրջանի հայտարարությունները վնասում են մեր պետությունների բարեկամական և դաշնակցային հարաբերությունների զարգացմանը, սրանով պայմանավորված ապագայուիմ Ձեր այցը Հայաստանի Հանրապետություն համարվում է անցանկալի»։

Ինքը՝ Կոնստանտին Զատուլինը, Ազգային ժողովի այս քայլը վիրավորական է գնահատել՝ նշելով, որ անակնկալի է եկել նման վերաբերմունքից, ավելին, նա հիշեցրել է, որ հոկտեմբերի 27-ից 29-ը Երևանում կայանալու էր Լազարևյան ակումբի նիստը, որը նախագահում է ինքը՝ Զատուլինը, և այդ նիստին հրավիրել է անգամ Ազգային ժողովի նախագահ Ալեն Սիմոնյանին և արտգործնախարար Արարատ Միրզոյանին։

Նախօրեին մենք տեղեկություն էինք հայտնել, որ Լազարևյան ակումբը քննարկելու է Հայաստանի գործող իշխանությունների վերջին շրջանի արևմտամետ վարքը, արտաքին քաղաքական վեկտորը փոփոխելու փաշինյանական քայլերը և աջակցություն է հայտնելու ընդդիմադիր քաղաքական միավորներին՝ փաշինյանական վարչախմբի դեմ պայքարում։ Կոնստանտին Զատուլինը հայտնի է ոչ միայն Նիկոլ Փաշինյանի հասցեին քննադատական խոսքեր հնչեցնելով, այլ նույնիսկ նախկին իշխանությունների օրոք բավականին լուրջ քննադատել է օրինակ, Սերժ Սարգսյանին։

Վերջինս սակայն երբեք չի էլ մտածել՝ Ռուսաստանում Հայաստանի ունեցած եզակի բարեկամներին և վիրավորելու, նրանց մուտքը Հայաստան այցելելու մասին։ Ընդհակառակը, Կոնստանտին Զատուլինը Հայաստանում միշտ էլ ջերմ են ընդունել։ Ըստ էության, Փաշինյանի այս քայլը երկու նպատակ ունի՝ առաջին հերթին խափանել Լազարևյան ակումբի նիստը և զրկել Կոնստանտին Զատուլինին Հայաստան գալուց, և երկրորդը՝ սա ուղղակի դեմարշ է ռուսաստանյան իշխանությունների դեմ։

Նոյեմբերի սկզբին ռուսաստանում կայանալու է Հայաստանի , ՌԴ և Ադրբեջանի ղեկավարների հանդիպումը, քննարկելու են ղարաբաղյան կարգավորման գործընթացը։ Եվ Փաշինյանը հստակ գիտակցում է՝ ինչ պայմաններ կարող է իր առջև դնել Ռուսաստանը, ուստի և փորձում է հեռվից հեռու վնասել ռուսական քաղաքականությանը՝ ցույց տալով, թե իբր Հայաստանում տնօրինում է քաղաքական իրավիճակը։

Աննա Նադոյան