Ընդդիմությունը հստակ պահանջ է դրել Արցախի քաղաքական էլիտայի առջև. Նիկոլի հե՞տ են, թե դեմ
ՎԵՐԼՈՒԾՈՒԹՅՈՒՆՆԵՐ
Արցախի նախագահ Արայիկ Հարությունյանի գլխավորած պատվիրակությունը Երևան այցելելուց հետո օրեր շարունակ չէր կարողանում հանդիպել վարչապետի պաշտոնը զբաղեցնող Նիկոլ Փաշինյանի հետ՝ բավարարվելով Ալեն Սիմոնյանի և այլ պաշտոնյաների հետ հանդիպումներով։
Փաշինյանը, հիշեցնենք, բավական ուշ ընդունեց միայն Արայիկ Հարությունյանին՝ հարկ չհամարելով հարգել պատվիրակության մյուս անդամներին։
Մեր աղբյուրների փոխանցմամբ, այդ օրերին Երևանում գտնվող արցախյան պատվիրակությունը փորձել է հանդիպումներ ունենալ հայաստանյան ընդդիմության առաջնորդների, մասնավորապես երկրորդ և երրորդ նախագահների հետ, անգամ բանագնացներ են ուղարկել՝ այդ հարցով բանակցելու։
Որևէ հանդիպում այդպեսէլ տեղի չի ունեցել, քանի որ նախկին նախագահները հստակ հասկացրել են, թե սկզբունքորեն խոսելու որևէ թեմա չունեն նրանց հետ։ Մասնավորապես, նշել են, որ հասկանալի չէ Արցախի քաղաքական էլիտայի դիրքորոշումները Նիկոլ Փաշինյանի նկատմամբ, մանավանդ, որ վերջինս չի էլ թաքցնում, որձ եռքերը լվացել է Արցախից, իսկ արցախյան քաղաքական ուժերին ասել՝ ձեր գլխի ճարը տեսեք։
Մինչդեռ, նույնիսկ գիտակցելով, որ Փաշինյանն իրենց մեն-մենակ է թողել Ադրբեջանի հետ, Արցախից պատվիրակություն են ուղարկում՝ իբր գործող վարչախմբի դիրքորոշումները ճշգրտելու, ինչը, առանց այցի էլ պարզ է։ Մեր աղբյուրը նշում է, որ Արայիկ Հարությունյանի պատվիրակությանը կասկած են հայտնել, արդյո՞ք այդ էլիտան իսկապես տարաձայնություններ ունի Նիկոլ Փաշինյանի հետ։ Նշել են, որ իմաստ ունի խոսել Արցախի քաղաքական ուժերի հետ, եթե նրանք ի վերջո կողմնորոշվեն՝ Նիկոլ Փաշինյանի հե՞տ են, թե՞ նրա դեմ։
Ընդդիմության առաջնորդը պահանջ են դրել՝ եթե դեմ են Նիկոլ Փաշինյանի և նրա վարչախմբի քաղաքականությանը, պիտի Արցախում բողոքի ակցիաներ սկսեն, ներկայացնեն իրենց սկզբունքային դիրքորոշումները, որից հետո իմաստ կունենա համագործակցելը։
Մարիա Գինոսյան
