Հյուսիսային Կորեան երբեք չի հրաժարվի միջուկային զենքից. Կիմ Չեն Ըն

Հյուսիսային Կորեայի առաջնորդ Կիմ Չեն Ընդը հայտարարել է, որ Միացյալ Նահանգների նպատակը ԿԺԴՀ-ում ռեժիմի տապալումն է, սակայն վերջինս չի հրաժարվի միջուկային զենքից անգամ, եթե իրեն տևական պատժամիջոցներ սպասվեն։ Այս մասին, ինչպես գրում է ՌԻԱ Նովոստին, հաղորդում է Yonhap գործակալութունը՝ հղում անելով հյուսիսկորեական պետական լրատվամիջոցներին։

Նշվում է, որ այս մասին Կիմ Չեն Ընը հայտարարել է ԿԺԴՀ 14-րդ գումարման Գերագույն Ժողովրդական Ժողովի յոթերորդ նստաշրջանի ժամանակ, որն անցկացվել է սեպտեմբերի 7-ին Փհենյանում։

«ԱՄՆ-ի նպատակը միայն մեր միջուկային զենքը վերացնելը չէ, այլև մեր միջուկային ներուժը ոչնչացնելը, ինքնապաշտպանության իրավունքից հրաժարվել ստիպելն ու մեզ թուլացնելը, որպեսզի ցանկացած պահի տապալի մեր ռեժիմը», - հայտարարել է ԿԺԴՀ առաջնորդը՝ ընդգծելով, որ ոչ մի պատժամիջոց չի ստիպի Հյուսիսային Կորեային հրաժարվել միջուկային զենքից։

«Սա սխալ դատողություն է ու սխալ հաշվարկ։ Պատժամիջոցներ սահմանեք թեկուզ հարյուր օրով, հազար օրով, տասը տարով կամ հարյուր տարով․ մենք չենք պատրաստվում հրաժարվել գոյատևման մեր իրավունքից ու ինքնապաշտպանության իրավունքից, որից կախված է երկրի ապագայի ու ժողովրդի անվտանգությունը։ Եվ որքան էլ բարդ իրավիճակում չհայտնվենք, միևնույն է մենք, որ պետք է զսպենք էլ ավելի մեծ միջուկային գերտերությանը՝ ԱՄՆ-ին, որը նման քաղաքական-ռազմական իրավիճակ է ստեղծել Կորեական թերակղզում, ոչ մի դեպքում չենք կարող հրաժարվել միջուկային զենքից», - հայտարարել է Կիմ Չեն Ընը։