Վարչախումբը շարունակում է որպես մահակ օգտագործել օրենքը
ՎԵՐԼՈՒԾՈՒԹՅՈՒՆՆԵՐ
Գործող իշխանությունները շարունակում են որպես մահակ օգտագործել ապօրինի գույքի բռնագանձման մասին օրենքը՝ գործող ռեժիմի ընդդիմախոսներին պատժելու համար։ Նշենք, որ այդ գործով մեկ տասնյակից ավելի հայցեր են ներկայացվել դատարան, շատերին էլ հրավիրել են գլխավոր դատախազություն՝ նրանց ունեցվածքի վերաբերյալ ուսումնասիրության նյութերին ծանոթանալու։
Առայժմ ամենախոշոր գործը, որով անցնում են նախկին իշխանավորները, Սյունիքի նախկին մարզպետ Սուրիկ Խաչատրյանի գործն է։ «Լիսկա» մականունով հայտնի Խաչատրյանին մեղադրում են առնվազն 19 միլիոն դրամ ապօրինի կերպով յուրացնելու մեջ։ Այդ գործերով նաև անցնում են Երևանի նախկին քաղաքապետ, տրանսպորտի և կապի նախկին նախարար Գագիկ Բեգլարյանը, նաև այլ պաշտոնյաներ։
Վերջին օրերին էլ իշխանությունները հատկապես սաստկացրել են գլխավոր դատախազություն հրավերները։ Ընդ որում բոլոր դեպքերում նախկին իշխանությունների ներկայացուցիչներ են, այդ թվում Երևանի նախկին փոխքաղաքապետ, նախկին թաղապետ, իսկ ամենաբարձրաստիճան պաշտոնյան, նախկին վարչապետ Հովիկ Աբրահամյանն է, որի ընտանիքի և նրա հետ փոխկապակցված 13 անձանց են հրավիրել գլխավոր դատախազություն, նյութերին ծանոթանալու համար։
Առայժմ միայն Հովիկ Աբրահամյանի որդին՝ Արգամ Աբրահամյանն է ներկայացել դատախազություն, ստացել իրեն վերաբերող փաթեթը, նրա վերաբերյալ առարկություններ ունենալու դեպքում ներկայացնելու համար։ Ըստ էության, բնավ չխախտելով անբաստանվողների անմեղության կանխավարկածը, չենք կարող նշել, թե նրանք հրեշտակներ են կամ երբևէ որևէ խախտումներ չեն իրականացրել, սակայն փաստն այն է, որ «Ապօրինի գույքի բռնագանձման մասին օրենքը» փաշինյանական իշխանությունն ընդունել է բացառապես իր քաղաքական ընդդիմախոսներին հետապնդելու, նրանց նեղելու և ֆինանսապես կամ անազատության տեսքով վնասելու համար։ Որևէ այլ տարբերակ պարզապես անհնար է դիտարկել։
Հայկ Ալեքսանյան
