Փաշինյանական իշխանությունը չի մասնակցի Արցախի անկախության տոնին

Գործող վարչախմբի որևէ ներկայացուցիչ վաղը՝ սեպտեմբերին 2-ին չի մեկնի Ստեփանակերտ, և չի մասնակցի Անկախության օրվա տոնակատարություններին։ 44-օրյա պատերազմից հետո փաշինյանական վարչախմբի բարձրաստիճան ներկայացուցիչները, այդ թվում՝ իրենց պարագլուխ Նիկոլ Փաշինյանը երբևէ չեն այցելել Արցախ։

Խնդիրը միայն Ադրբեջանի արգելքը չէ, թեև Իլհամ Ալիևն ամեն դեպքում վայնասուն է բարձրացնում, երբ հայաստանյան քաղաքական դաշտից, լինի ընդդիմություն, թե իշխանություն, որևէ մեկը հանդգնում է այցելել Արցախ։

Բանն այն է, որ նիկոլականների երեսն էլ չի բռնում այցելել Արցախ։ Կա նաև ամենապարզ վախը։

Վարչապետի աթոռը զավթած անձն ու նրա սպասարկուներն առյուծ են կտրում միայն Երևանում, ոստիկանական արգելափակոցների և ՊՊԾ աշխատակիցների թիկունքում, սակայն հրաշալի գիտեն, որ Արցախում իրենցից հաշիվ են պահանջելու առանց աչք թարթելու մեր երկրի մի հսկա հատվածն Ադրբեջանին նվիրելու համար։

Արցախ այս տարի նաև խորհրդարանական պատվիրակություն չի մեկնի, թեպետ Արցախի Ազգային ժողովի նախագահ Արթուր Թովմասյանը հատուկ հրավեր է արել թե՛ իշխանական, թե՛ ընդդիմադիր պատգամավորներին․ Արցախ չմեկնելու համար Ալեն Սիմոնյանն ինքն իրեն արձակուրդ է գրել, պարտականությունները բարդել Ռուբեն Ռուբինյանի վրա։ Նրան հատուկ այդ նպատակով հետ են կանչել հերթական արձակուրդից։

Ռուբինյանն էլ պատճառաբանելու է, թե չի կարող լքել խորհրդարանը և մեկնել Ստեփանակետ։ Արդյունքում, Արցախի անկախության օրվա տոնակատարություններին կմասնակցեն միայն հայաստանյան ընդդիմության ներկայացուցիչները։

Գուրգեն Նահապետյան