Ռուսական ապտակ Նիկոլ Փաշինյանին
ՎԵՐԼՈՒԾՈՒԹՅՈՒՆՆԵՐ
Ռուսաստանի արտգործնախարար Սերգեյ Լավրովը երեկ Կամբոջայի մայրաքաղաք Պնոմպենում մամուլի ասուլիսում պատասխանել է լրագրողի հարցին.
- Արդյո՞ք Ռուսաստանը անհրաժեշտություն է տեսնում Արցախում ռուսական խաղաղապահ զորակազմի մանդատի վերաբերյալ առանձին հուշագիր ստորագրելու հարցում։
Հիշեցնենք՝ վարչապետ Նիկոլ Փաշինյանը հայտարարել էր, թե խիստ անհրաժեշտ է դառնում Լեռնային Ղարաբաղում խաղաղապահ օպերացիայի մանրամասների ճշգրտումը, նաև չէր բացառել, որ անհրաժեշտ է միջոցներ ձեռնարկել խաղաղապահների մանդատը միջազգայնորեն հաստատելու, կամ խաղաղապահներին ավելի լայն միջազգային մանդատով օժտելու ուղղությամբ։
Ըստ էության, ռուսական խաղաղապահ զորախմբի դեմ սկսված արշավը հարուցել է ռուսական իշխանությունների բուռն վրդովմունքը։ Նրանցից շատերը արդեն տարակուսանք են հայտնում Փաշինյանի այս հայտարարությունից, իսկ Սերգեյ Լավրովն առանց սեթևեթելու Նիկոլ Փաշինյանին մեղադրել է ստախոսության մեջ։ Նա նշել է, թե իր համար դժվար է այդ հարցին պատասխանել, քանի որ չեն տեսել հստակ առաջարկներ, որոնք Հայաստանի վարչապետը ցանկանում է քննարկման դնել Լեռնային Ղարաբաղում ռուսական խաղաղապահ զորակազմի գործողության համատեքստում։
«Ուստի չեմ կարող գուշակություններ անել, Ռուսաստանի, Ադրբեջանի և Հայաստանի ղեկավարների միջև ձեռք բերված պայմանավորվածությունների կողմերից յուրաքանչյուրը իհարկե իրավասու է հանդես գալ հավելյալ նախաձեռնություններով, բայց առայժմ մենք որևէ առաջարկ չենք տեսել»,- ասել է Լավրովը։
Ավելի ուշ ՀՀ ԱԳՆ խոսնակը պաշտոնապես հերքեց Սերգեյ Լավրովի ասածը, նշելով, որ դեռ 2021թ. են ներկայացրել առաջարկները, այն էլ՝ գրավոր։ Ըստ էության, երեկ նախօրեին, Ռուսաստանի նախագահի խոսնակ Դմիտրի Պեսկովի դեղին քարտից հետո, ևս մեկ դեղին քարտ էլ Փաշինյանին ցույց է տալիս Սերգեյ Լավրովը։
Այս ամենի հետևանքները կարող են չափազանց ծանր լինել Հայաստանի և Արցախի համար, եթե Հայաստանի գործող իշխանությունները իրենց հիմնական պարտականություններով զբաղվելու, արցախահայության կյանքն ու անվտանգությունը ապահովելու փոխարեն շարունակեն մեղադրանքներ հղել Ռուսաստանին։
Առանց այն էլ 2018 թվականի իշխանափոխությունից հետո փաշինյանական վարչախումբը առանձնապես մեծ վստահություն չունի ռուսական քաղաքական շրջանակներում, և տևական ժամանակ Ռուսաստանին իր սեփական հավատարմությունը ապացուցելու փորձերից հետո այժմ նման վարքը կարող է լուրջ խնդիրներ հարուցել ոչ միայն գործող վարչախմբի, այլև ամբողջ Հայաստանի համար։
Կարեն Սերոբյան
