Երկու ազդակ Ռուսաստանից. Փաշինյանին զգուշացնում են

Ռուսաստանի ԱԳՆ-ն երեկ երկու ուշագրավ հայտարարություն է տարածել, որոնք լուրջ մտահոգության տեղիք կարող են տալ փաշինյանական վարչախմբին։ ՌԴ ԱԳՆ մամուլի վարչության փոխտնօրեն Իվան Նեչաևը անդրադարձել է ԵԱՀԿ ՄԽ հարցով արևմուտքի շահագրգռությանը, նշել, թե Ռուսաստանը չի առարկում ոչ տարածաշրջանային խաղացողների ներգրավման դեմ, եթե նրանք գործում են վերը նշված պայմանավորվածություններին համապատասխան և նպաստում են դրանց իրականացմանը:

Նեչաևի խոսքով, գլխավորը կրկնօրինակում ու քողարկված խաղեր թույլ չտալն է՝ ինչ-որ մեկին թուլացնելու, գործը խափանելու նպատակով։

 «Ցավոք, մենք մեկ անգամ չէ, որ ստիպված ենք եղել առնչվել Եվրամիության և Միացյալ Նահանգների կողմից նման պրակտիկայի հետ»,- ասել է Նեչաևը, հավելելով, թե Ռուսաստանը հանդես է գալիս Հարավային Կովկասը խաղաղության և բարգավաճման գոտու վերածելու օգտին։ Այսկերպ, ՌԴ-ն հասկացնում է թե՛ ԱՄՆ-ին ու ԵՄ-ին, թե՛ ԵԱՀԿ Մինսկի խմբի մասին պարբերաբար հայտարարող ՀՀ իշխանություններին, որ իրենց համար լիովին պարզ են այդ քայլի շարժառիթները, և կարիք չկա քողարկված խաղեր տալու։

Նույն ասուլիսում ԱԳՆ ներկայացուցիչն անդրադարձել է ՌԴ քաղաքացի Արմեն Գրիգորյանի մահվան և մեկ այլ քաղաքացի Միկա Բադալյանի շուրջ զարգացումներին։ Նեչաևը նշել է, թե Ռուսաստանն աջակցում է եղբայրական Հայաստանի մի շարք հասարակական ակտիվիստների և քաղաքական գործիչների` Ռուսաստանի հետ հարաբերությունները որպես առաջնահերթություն զարգացնելու և խորացնելու կոչերին։

«Մենք ուշադիր հետևում ենք Հայաստանում ստեղծված իրավիճակին, անկեղծորեն շահագրգռված ենք, որպեսզի մեր դաշնակից երկիրը զարգանա կայուն և կանխատեսելի կերպով՝ խաղաղության և ազգային համաձայնության մթնոլորտում»,- նշել է նա:

Նրա խոսքով` ներքաղաքական կյանքի բոլոր հարցերը պետք է լուծվեն բացառապես իրավական և սահմանադրական դաշտում, համապատասխան ժողովրդավարական ընթացակարգերի շրջանակներում և, իհարկե, առանց բռնության: Նեչաևը նշել է նաև, որ Մոսկվայում հետագայում ևս հետևելու են Բադալյանի ճակատագրին, ինչպես նաև սերտ շփումներ են պահպանելու բարեկամ հանրապետության բոլոր պատասխանատու քաղաքական ուժերի հետ: Հատկապես այս վերջին հայտարարությունը նախազգուշացում է Փաշինյանին, որ ՌԴ-ն կարող է քարտ-բլանշ տալ ընդդիմությանը, եթե շարունակեն դիպչել իրենց քաղաքացիներին։ Երկու դեպքում էլ ազդակները մտահոգիչ են լինելու գործող վարչախմբի համար։

Հայկ Բաբայան