Տարօրինակ ուղերձ Արցախից. ընդդիմությունը «կուտը» չկերավ

Հայաստանի խորհրդարանական ընդդիմությունը որոշել է սեպտեմբերին վերադառնալ խորհրդարան, սակայն բացառապես իր օրակարգով։ Մանդատներից չզրկվելուց հետո ընդդիմությունը ոչ թե հանդես եկավ իշխանությանը գովերգող հայտարարություններով, այլ ընդհակառակը հայտարարեց, թե իշխող ուժի այդ նախաձեռնությունը իրեն բացառապես չի հետաքրքրում, և իրենք կվերադառնան խորհրդարան միայն իրենց օրակարգը սպասարկելու համար։

Այն, որ այդ հայտարարությունը դառնալու էր փաշինյանական վարչախմբի և նրան մերձիշխանական ուժերի կողմից գովասանքի խոսքեր հղելու արշավի, որևէ մեկը չէր կասկածում։ Զարմանալիորեն, սակայն այդպիսի հայտարարություններ հնչեցին նաև Արցախի խորհրդարանից։ Արցախի Ազգային ժողովի նախագահ Արթուր Թովմասյանն է ուղերձ հղել Հայաստանի խորհրդարանականներին, որում մասնավորապես ասվում է.

«Ողջունում եմ ՀՀ ԱԺ ընդդիմադիր խմբակցությունների՝ սեպտեմբերին խորհրդարան վերադառնալու և պատգամավորական աշխատանքը շարունակելու որոշումը, Արցախի Հանրապետությունում ներքաղաքական կուսակցային շահերին միտված օրակարգեր չկան, և մենք միասնաբար ենք հաղթահարում արտաքին և ներքին մարտահրավերները։ Տարածաշրջանում տևական խաղաղության ճանապահը հարթ չէ, բայց համոզված եմ, որ Հայաստանի և Արցախի խորհրդարանները առանձին աշխատելով չեն կարող հաղթահարել օրեցօր ավելացող խոչընդոտները՝ միայն միասնաբար գործելով հաջողություն կարձանագրենք»,- նշել է Թովմասյանը։

Ընդդիմության բազմաթիվ ներկայացուցիչներ քննադատել են Արթուր Թովմասյանի այս հայտարարությունը՝ այն տարակուսելի համարելով։ Իսկ «Հայաստան» խմբակցությունից պատգամավոր Գեղամ Մանուկյանը հայտարարել է, թե իրենք ընդունելու են Թովմասյանի ՝ սեպտեմբերի 2-ին Արցախ այցելելու հրավերը, փոխարենը առաջարկել են նաև, որպեսզի Հայաստանի իշխանությունները ևս գնան Արցախ՝ մասնակցելու Հանրապետության հռչակման 31-րդ տարեդարձին նվիրված տոնական միջոցառումներին։

Հիշեցնենք, որ 44-օրյա պատերազմից հետո Հայաստանի բարձրագույն իշխանության և որևէ ներկայացուցիչ ընդհանրապես չի այցելել Արցախ, չի հանդիպել Արցախի իշխանություններին, կամ հասարակ ժողովրդին և չի ներկայացրել իր մոտեցումները Արցախում ստեղծված իրավիճակի կապակցությամբ։

Այդուհանդերձ, հարկ է նշել, որ Արթուր Թովմասյանի այս, իբր խիստ, դիվանագիտական ողջույնը իր մեջ լրջագույն վտանգներ է պարունակում։ Չի բացառվում, որ Հայաստանի իշխանությունների դրդմամբ է արվել այս հայտարարությունը, որպեսզի ցույց տան, թե Արցախում ևս ողջունում են Խորհրդարան վերադառնալու ընդդիմադիրների որոշումը։

Վարդան Մակարյան