Փաշինյանական իշխանությունը սեպ է խրում Հայաստանի և Սփյուռքի միջև
ՎԵՐԼՈՒԾՈՒԹՅՈՒՆՆԵՐ
Շուրջ մեկ շաբաթ լռություն պահպանելուց հետո գործող իշխանությունները վերջապես պարզաբանում են տարածել, թե ինչու են ֆրանսահայ ՀՅԴ բյուրոյի անդամ Մուրադ Փափազյանի մուտքը արգելել Հայաստան։ Կառավարությունը անցանկալի անձանց շարքում հայտնված դաշնակցական գործչին մեղադրում է Փարիզում՝ վարչապետի գլխավորած պատվիրակության ավտոշարասյան դեմ հարձակումը կազմակերպելու համար։ Դեպքը, հիշեցնենք, տեղի էր ունեցել անցած տարվա օգոստոսին։ Փաշինյանի դեմ բողոքի ակցիայի մասնակիցները տարբեր առարկաներով հարվածել էին մեքենաներին, և լրագրողներին տեղափոխող մեքենայի հայելին էր կոտրվել։
Վարչապետի աշխատակազմը պարզաբանում է տարածել և նշել, թե վարչապետի ՀՀ պետական դրոշակակիր ավտոմեքենան ենթարկվել է հարձակման, և ստեղծված իրավիճակը հաղթահարվել է միայն ֆրանսիական ոստիկանության և անվտանգության ուժերի, ջանքերի արդյունքում։ Մեկ տարի առաջ տեղի ունեցած այդ դեպքով նույնիսկ Ֆրանսիայում քրեական գործ չեն հարուցել՝ հաշվի առնելով, որ գործը քաղաքական է, և մարդիկ իրենց բողոքի ձայնն են բարձրացրել։
Մինչդեռ, Մուրադ Փափազյանը հայտարարում է, թե գործող իշխանությունները ստում են, ինքն ընդհանրապես չի մասնակցել այդ ակցիային։
Հուլիսի 14-ին, հիշեցնենք Մուրադ Փափազյանը փորձել էր ժամանել Հայաստան, սակայն օդանավակայանում նրան կանգնեցրել էին, խլել անձնագիրը և հետ ուղարկել Հայաստանից։ Ընդհանրապես սփյուռքահայերի նկատմամբ փաշինյանական իշխանության այս վերաբերմունքը, հատկապես Սփյուռքի՝ ընդդիմադիր տրամադրված շրջանակների նկատմամբ, վկայում է մեկ բանի մասին՝ գործող իշխանությունները ձեռք են քաշել ոչ միայն Արցախից, այլ նաև Սփյուռքից։ Եվ այժմ, ամեն ինչ անում են հայ ժողովրդի տարբեր հատվածների միջև սեպը խորացնելու և անվստահության մթնոլորտ սերմանելու համար։
Օրեր առաջ էլ ԱԱԾ-ն էր մի օրենքի նախագիծ դրել շրջանառության մեջ, որով առաջարկում է խստացնել սփյուռքահայերին Հայաստանի քաղաքացիություն տրամադրելու կարգը։ Տասնամյակներ շարունակ Հայաստանի իշխանություններն իրենց բոլոր թերություններով հանդերձ, առնվազն ամեն ինչ արել են, որպեսզի Հայաստանում և Սփյուռքում բնակվող հայերի միջև լինի փոխըմբռման և համերաշխության լիակատար մթնոլորտ, իսկ սփյուռքի ներուժն օգտագործել են համահայկական և հանուն Հայաստանի տարբեր նախաձեռնությունների համար։
Արցախյան 44-օրյա պատերազմից հետո այլևս փաստ է, որ Նիկոլ Փաշինյանին Սփյուռքն ընդհանրապես պետք չէ։ Նա ամեն գնով ցանկանում է պահպանել իր իշխանությունը և այդ առումով հրաշալի հասկանում է, որ Սփյուռքի հայրենասեր կառույցները իր դաշնակիցը չեն։ Իր դաշնակիցն ընդամենը Թուրքիայի և Ադրբեջանի նախագահներն են։
Գարիկ Հովսեփյան
