Աշնանը Հայաստանում թեժ փոփոխություններ են սպասվում
ՎԵՐԼՈՒԾՈՒԹՅՈՒՆՆԵՐՄինչ հայաստանյան ընդդիմությունը՝ Խորհրդարանական ընդդիմությունը հայտարարում է, թե աշնանը պայքարի նոր սեզոն է բացելու գործող վարչախմբի դեմ, Նիկոլ Փաշինյանի վարչախմբում պատրաստվում են աշնանը սպասվելիք փոփոխություններին։
«Քաղաքացիական պայմանագրում» մեր աղբյուրների փոխանցմամբ, ինքը՝ Փաշինյանն է, կողմնակիցներին հայտնել, որ որոշ պաշտոնյաներ պարզապես հրաժեշտ են տալու իրենց պաշտոններին, իսկ նրանց փոխարեն նոր կամ վաղուց հայտնի անձինք են նշանակվելու, որոնք կկարողանան ղեկավարել իրենց կառույցները։
Նույնիսկ խոսակցություններ են շրջանառվում, թե Նիկոլ Փաշինյանը մտադիր է մանդատից զրկել իր մի քանի կողմնակիցների և հաջորդ համարներին բերել խորհրդարան, որոնց սկսել է ավելի շատ վստահել, քան ներկայումս գործող պատգամավորներին։
Առաջին հերթին Նիկոլ Փաշինյանը մտադիր է փոփոխություններն իրականացնել Ներքին գործերի նոր ձևավորվելիք նախարարությունում։ Ընդ որում, մեր աղբյուրը ՔՊ-ում հայտնեց, թե առայժմ Փաշինյանը որևէ մեկին չի խոստացել այդ պաշտոնը։ Այդ պաշտոնի համար ակնկալիքներ ունեն մի շարք պաշտոնյաներ, որոնցից որևէ մեկին դեռ հստակ խոստում չի տրվել։ Առնվազն երկու-երեք գործող նախարարներ էլ հրաժեշտ են տալու իրենց պաշտոններին։
Առաջիններից մեկը, ով ընդհանրապես կզրկվի պաշտոնից և կհեռացվի, Տարածքային կառավարման և ենթակառուցվածքների նախարար Գնել Սանոսյանն է։ Վերջինս, որը «հեղափոխական» թիմին միացավ ընդամենը իշխանափոխությունից հետո, իսկ մինչ այդ անտրտունջ ծառայում էր նախկիններին, արդեն հասցրել է լուրջ խնդիրներ հարուցել «Քաղաքացիական պայմանագիր» խմբակցության հետ։ Իշխող ուժը մտադիր է հրաժեշտ տալ Սանոսյանին։
Ամեն դեպքում «Քաղպայմանագիրն» այժմ գնացել է արձակուրդ, վերադառնալու է միայն օգոստոսի վերջին, պատրաստվելու սեպտեմբերի 18-ին կայանալիք կուսակցության վարչության ընտրություններին և համագումարին։ Միայն համագումարում կուսակցության վարչության ձևավորումից հետո, այլևս հնարավոր կլինի խոսել լուրջ վերադասավորումների մասին իշխանության ներսում։ Ինքը՝ Նիկոլ Փաշինյանը, թեև ընդամենը ակնարկել է փոփոխությունների մասին, սակայն այլ մանրամասներ կուսակիցներին չի հայտնել՝ նրանց թողնելով նյարդային և լարված իրավիճակում։
Կարեն Սերոբյան
