ԲԴԽ-ն նոր նախագահ է ընտրելու. ո՞վ կդառնա Փաշինյանի սրտի դատավորապետը

Հայաստանի Բարձրագույն դատական խորհուրդն այսօր պետք է նոր նախագահ ընտրի։ Բանն այն է, որ օրենսդրությունը պահանջում է Բարձրագույն դատական խորհրդի նախագահ ընտրել խորհրդի գործող անդամներից, նախկին նախագահի կողմից պաշտոնեական լիազորությունները կասեցնելուց հետո տասնօրյա ժամկետում։

Ռուբեն Վարդազարյանի լիազորությունները կասեցվել էին 10 օր առաջ, և դրանից հետո տեղեկություններ էին շրջանառվում, թե Բարձրագույն դատական խորհրդի նախագահի պաշտոնը զբաղեցնելու է Գագիկ Ջհանգիրյանը, ով, սակայն, օրեր առաջ հրաժարական տվեց այդ պաշտոնից, ոչ թե Վարդազարյանի հրապարակած աղմկահարույց ձայնագրության, այլ ներկլանային պայքարի արդյունքում։

Բարձրագույն դատական խորհրդում այս օրերին շրջանառվում են 3 թեկնածուների անուններ, երեքն էլ առանձնապես աչքի չեն ընկել արդարադատություն իրականացնելու հարցերով։ Նշվում են Արդարադատության նախկին փոխնախարար Վիգեն Քոչարյանի, իրավաբան Գրիգոր Բեկմեզյանի և «Սորոսի» հիմնադրամի նախկին համակարգող, հակակոռուպցիոն կոմիտեի նախագահ Սասուն Խաչատրյանի եղբոր՝ Դավիթ Խաչատուրյանի անունները։

Այս երեք թեկնածուներից յուրաքանչյուրն էլ, ով էլ դառնա Բարձրագույն դատական խորհրդի նախագահ, ըստ էության, ԲԴԽ-ն մատնելու է անգործության և հանուն Նիկոլ Փաշինյանի՝ դատարանների նկատմամբ ճնշման գործիքի։ Ճիշտ է, նրանցից որևէ մեկը չունի Ջհանգիրյանի պատրաստվածությունը, ինչպես նաև լպիրշության այն աստիճանը, որ Ջհանգիրյանն օգտագործում էր դատավորների հետ հարաբերվելիս։

Ըստ էության, իշխանություններն իրենք էլ Ջհանգիրյանին հեռացնելով՝ հենց նախաձեռնում են նման գործընթաց, որպեսզի Բարձրագույն դատական խորհուրդը լիակատար կախվածության մեջ գտնվի իշխանությունից, իսկ դատարանների հետ հարաբերվի բացառապես Նիկոլ Փաշինյանի պահանջներով։ Երեքից ով էլ, որ դառնա ԲԴԽ նախագահ, հայկական արդարադատության համակարգում որևէ զգալի փոփոխություն տեղի չի ունենալու։ Ընդհակառակը, ունենալու ենք ավելի կախյալ, խեղճացած Բարձրագույն դատական խորհուրդ։

Հայկ Հարությունյան