Իրանը շտապում է օգնության քրդերին, Ռուսաստանը ամրանում է Թուրքիայի հետ սահմանին
ՄԻՋԱԶԳԱՅԻՆ
Մինչ Թուրքիան պատրաստվում է նոր ռազմական գործողություններ իրականացնել «Քրդական բանվորական կուսակցության հետ կապված ահաբեկիչների» դեմ Սիրիայի հյուսիսում, Իսլամական Հանրապետությունը իր մարտիկներին տեղափոխում է այնտեղ:
Այս մասին Reuters-ին հայտնել են Սիրիայի հյուսիսում գտնվող աղբյուրները։
Նախագահ Ռեջեփ Թայիփ Էրդողանի գլխավորությամբ Թուրքիայի կառավարության երեկվա նիստից հետո պաշտպանության նախարար Հուլուսի Աքարը լրագրողներին ասել է, որ ռազմական գործողությունը «կսկսվի, երբ հարմար պահը գա»։
«Մեր միակ թիրախը ահաբեկիչներն են»,- ասել է Թուրքիայի ռազմական գերատեսչության ղեկավարը և հավելել. «Իսկ քրդերն ու արաբները մեր եղբայրներն են»:
Նշենք, որ ԱՄՆ-ը բացահայտորեն դեմ է Սիրիայի հյուսիսում թուրքական ռազմական գործողությանը։ Վաշինգտոնը կարծում է, որ զինված էսկալացիան կխաթարի ԴԱԻՇ-ի դեմ պայքարը և կվտանգի տարածաշրջանի անվտանգությունը։
Իր հերթին Ռուսաստանը, որը դեռ հրապարակայնորեն չի հայտարարել իր անհամաձայնությունը Թուրքիայի ծրագրերի հետ, իր ստորաբաժանումները կենտրոնացնում է Սիրիայի հյուսիսում։
Աղբյուրները Reuters-ին հայտնել են, որ Բաշար ալ Ասադը, չնայած Թուրքիայի կողմից նոր ռազմական գործողությունների հնարավորությանը, շարունակում է իր ուժերը կենտրոնացնել տարածաշրջանում Ռուսաստանի հետ միասին։
Անկարայի կողմից աջակցվող Սիրիայի ազգային բանակի կապիտան Յուսուֆ Համիդն ասել է, որ Իրանը նույնպես զինյալներ է ուղարկել տարածք՝ քրդերին աջակցելու համար: Նրա խոսքով՝ ռուսական բանակն ամրապնդում է իր դիրքերը Քոբանի, Այն Իսա, Թել Ռիֆաթ և Մանբիջ քաղաքների շրջանում, որոնք Թուրքիայի ծրագրված հակաահաբեկչական գործողության հիմնական թիրախներն են։ Այս դիրքերը գտնվում են սիրիա-թուրքական սահմանից մոտավորապես 40 կիլոմետր հեռավորության վրա։
Al-Araby-al-Jadid-ի արաբական խմբագրությունը հայտնում է, որ թուրքական բանակի հարձակումը երկրի հյուսիսում կանխելու համար Դամասկոսից սիրիական բանակի էլիտար զորամաս է տեղակայվել, որի հրամանատարն է Մահեր ալ-Ասադը` Սիրիայի նախագահի հորեղբոր տղան։ Դիվիզիան արդեն գրավել է Հալեպի հյուսիսում գտնվող Մենանգ ռազմական օդանավակայանի և շրջակա մի շարք բնակավայրերի տարածքը։
Նշվում է, որ այս տարածքում ամրություններ են տեղադրվում, ստեղծվում են երկարաժամկետ կրակակետեր։ Ըստ լրագրողների՝ սիրիական զորքերը դիրքեր են գրավում թուրքական բանակի հարձակման ամենահավանական ուղղությամբ։
Միաժամանակ, Սիրիայի հյուսիսում նկատվել է ռուսական «Պանցիր-Ս» հակաօդային պաշտպանության առնվազն երկու համակարգ։ Նրանց տեսել են Թել Թամր բնակավայրի մոտ, այսինքն, որտեղ Թուրքիան նախատեսում է ռազմական գործողություն իրականացնել 30 կիլոմետրանոց անվտանգության գոտի ստեղծելու համար։
Բացի այդ, Ռուսաստանի օդատիեզերական ուժերն այս հատվածում Սիրիայի ռազմաօդային ուժերի հետ համատեղ վարժանքներ են անցկացնում՝ «թշնամու օդային հարվածները» հետ մղելու նպատակով։
ՌԴ պաշտպանության նախարարությունը չի մեկնաբանում Սիրիայի հյուսիսում երկու զենիթահրթիռային համակարգերի տեղակայման պատճառը։
Միաժամանակ ակնկալվում է, որ հունիսի 8-ին ՌԴ ԱԳ նախարար Սերգեյ Լավրովի` Անկարա այցի ընթացքում քննարկման հիմնական թեմաներից մեկը կլինի Թուրքիայի պլանները՝ կապված Սիրիայի հյուսիսում սպասվող օպերացիայի հետ։ Պատահական չէ, որ Լավրովին ուղևորության ժամանակ կուղեկցի «ռազմական փորձագետների խումբ»։
Ավելի վաղ «Սիրիայի դեմոկրատական ուժերի դաշինքի» դաշտային հրամանատար, գեներալ Ֆերհատ Աբդի Շիրինը (Մազլում Քոբանի) հայտարարել էր, որ պատրաստ է սիրիական կառավարական ուժերի հետ ուս ուսի տված կռվել թուրքական բանակի դեմ։ Նրա խոսքով՝ Բաշար ալ-Ասադը պատրաստ է հակաօդային պաշտպանության համակարգեր կիրառել Թուրքիայի ռազմաօդային ուժերի սպասվող հարվածների դեմ։
Այսօր Սիրիայի դեմոկրատական ուժերը պաշտոնապես հայտարարել են Ասադի կառավարության հետ համագործակցելու պատրաստակամության մասին։ Դաշինքի տարածած հայտարարության մեջ ասվում է, որ այս որոշումը կայացվել է ռազմական խորհուրդների մասնակցությամբ քննարկումների ժամանակ։
Սիրիայի հյուսիսում, ինչպես նաև Թուրքիայի կողմից վերահսկվող տարածքներում TRT Haber հեռուստաալիքի համար աշխատող մի խումբ լրագրողներ հայտնել են, որ անօդաչու սարքերի օգտագործմամբ քրդական ստորաբաժանումների դիրքերի վրա բարձրացվել են Սիրիայի և ՔԲԿ-ի դրոշները։
Թուրք լրագրողների դիտարկումների համաձայն՝ ՔԲԿ-ի հետ կապված ահաբեկչական խմբավորումները վերջին օրերին ակտիվորեն ամրապնդում են իրենց դիրքերը՝ կառուցելով ամրություններ և ճեղքելով նոր թունելներ։
