Այս պատմությունն ահազանգ է՝ շտկելու, ուղղելու այն բոլոր թերացումները, որ կան մեզանում. Արթուր Վարդանյանը՝ «Պապայի աղջիկները» սերիալի մասին. Լուսանկարներ, (Տեսանյութ)
ՎԻԴԵՈ
Փետրվարի 7-ից ժամը 23:10-ից «Երկիր Մեդիա» հեռուստաալիքով կմեկնարկի «Պապայի աղջիկները» նոր հեռուստասերիալը, որի պրոդյուսերն է ռեժիսոր Արթուր Վարդանյանը:
«Այս դեպքում ես նախընտրում եմ օգտագործել հեռուստաֆիլմ բառը, քանի որ այն բեմադրվում և նկարահանվում է թեև ժամանակակից , սակայն ինձ հոգեհարազատ՝ դասական մոտեցումներով: Կարծում եմ՝ այն կդառնա հեռուստադիտողի կյանքի ու կենցաղի մի հատվածը և կլինի երկարատև», - Aysor.am-ի հետ զրույցում նշեց ռեժիսորը:
Նրա բնորոշմամբ՝ առանցքում երեխաների պաշտպանության թեման է՝ կարևորագույն խնդիրներից մեկը, որը, ցավոք, արդի է ողջ աշխարհում և արժանի է բոլորի ուշադրությանը:
«Այս պատմությունը ևս մեկ ահազանգ է՝ շտկելու, ուղղելու այն բոլոր թերացումները, որ այսօր կան մեզանում: Երեխաների անհոգ ու խաղաղ մանկությունը նրանցից յուրաքանչյուրի ու նաև ողջ հասարակության ապագան է: Վերնագիրը գալիս է հեռուստաֆիլմի հերոսների՝ հոր և աղջկա հարաբերություններից, հոր և դստեր հոգևոր կապի բարձր գաղափարն է ֆիլմի հիմքում, ինչը, կարծում եմ, հարազատ կլինի շատ շատերին, նաև՝ պապայի աղջիկներին», - մանրամասնեց մեր զրուցակիցը:
Սերիալի հերոսուհին 12 տարեկան Մարիամն է, ով անցնելուվ կյանքի տարբեր փորձությունների միջով՝ չի կորցնում իր ինքնությունը, կյանքին դիմակայելու ուժը, ազնվությունը, մարդկային տեսակը: Ոչ թե չարանում, այլ ընդհակառակը՝ փորձում է օգնել դիմացինին, դպրոցում էլ սովորում է գերազանց:
«Իհարկե, հարց է ծագում՝ եթե հերոսուհին Մարիամն է, ինչո°ւ է հեռուստասերիալը կոչվում «Պապայի աղջիկները», այլ ոչ թե աղջիկը: Այդ առումով հեռուստադիտողին սպասվում է անակնկալ, որը կբացահայտվի քիչ ավելի ուշ», - խորհրդավորությունը պահեց Ա. Վարդանյանը:
Սցենարի հեղինակը Արսեն Սարգսյանն է, Մարիամի դերը մարմնավորում է Էդիտա Հարությունյանն, ով ընտրվել է քասթինգին մասնակցող շուրջ 300 երեխայի միջից:
«Երկար փնտրտուքների արդյունքում ենք նրան ընտրել, իր մեջ գտա իմ հերոսուհուն: Հայրիկի դերում սիրված դերասան Հայկ Սարգսյանն է, ով հեռուստադիտողին ծանոթ է բազմաթիվ հեռուստանախագծերից և ֆիլմերից: Ընդհանրապես, ընդգրկված է սիրված դերասանների մի մեծ աստղաբույլ», - նշեց նա:
Սերիալում հնչող երաժշտությունը պատկանում է կոմպոզիտոր Վահան Նահապետյանին, բառերի հեղինակն է ռեփեր Էլոն, ով էլ կատարում է երգը:
Ի դեպ, Արթուր Վարդանյանը բոլորովին վերջերս աշխատում էր մեկ այլ սերիալի շրջանակներում: Հարցին, թե արդյոք մեկը մյուսին չի խանգարում, պատասխանեց.
«Նախորդ սերիալի աշխատանքներն արդեն ավարտվել են: Ներկա պահին աշխատում եմ միայն այս նախագծի վրա: Սակայն ստեղծագործող անհատը, արվեստագետը երբեք մեկ նախագծի վրա չի աշխատում ու բավարարվում դրանով: Նա մշտապես փնտրտուքների մեջ է, այնպես որ ունեմ բազմատիվ պլաններ, որոնց ուղղությամբ ևս աշխատում եմ: Իսկ համատեղելն, իհարկե, դժվար է, սակայն հենց այս ամենն էլ ծնում է մտքերի բազմազանություն»:
Բացի սերիալի նկարահանումներից, ռեժիսորն աշխատում է մեկ այլ նախագծի վրա ևս, որի մասին դեռևս նախնտրում է լռել:
«Այս պահին իրականացնում եմ բավականին ծավալուն և, ինչը կարևոր է, իրապես աննախադեպ մի նախագիծ: Այն լիովին տարբերվում է մինչ այս արված իմ պրոյեկտներից: Չեմ ուզում ամբողջությամբ բացել փակագծերը, պարզապես ասեմ, որ լինելու է հոգևոր թեմային առնչվող ցուցահանդես՝ յուրօրինակ էքսպոնատներով: Վերջիններից յուրաքանչյուրն իրենից ներկայացնում է հայկական լավաշ, սակայն ոչ սովորական. այստեղ թաքնված է խորհրդավոր, առեղծվածային իմաստը: Ցուցահանդեսն ուղեկցվելու է ֆիլմի ցուցադրությամբ և կոչվելու է «Ես եմ հացը կենդանի», - խոստովանեց Aysor.am-ի զրուցակիցը:
Դիտարկմանը, թե ինչո՞վ էր պայմանավորում իր՝ հեռուստաաշխարհում տևական լռությունը և ինչո՞ւ է որոշել գործունեությունը վերսկսել հենց սերիալներով, նկատեց.
«Դա գուցե եթերային լռություն էր, բայց ոչ երբեք ստեղծագործական: Պարզապես ցանկացած նախագիծ, մտահղացում կարիք ունի մշակման, իսկ որոկյալ արտադրանքը, բնականաբար, ժամանակ է պահանջում: Ես հանդիսանում եմ այս հեռուստասերիալի պրոդյուսերը, իսկ անցած ճանապարհս, նաև՝ նկարահանածս հեռուստաֆիլմերը ունեցել են իրենց տեղը, ասել իրենց խոսքը, ուստիև, «լռության» հիմնական պատճառներից մեկը հենց որակյալ արտադրանք տալն է»:
