Ռուսաստանում էլ գիտեն, որ Ադրբեջանն ունի դեպի ՆԱՏՕ կողմնորոշում. ադրբեջանագետ

Ռուսաստանի նախագահ Վլադիմիր Պուտինն այսօր հեռախոսազրույց է ունեցել Ադրբեջանի նախագահ Իլհամ Ալիևի հետ։ Կրեմլի փոխանցմամբ՝ զրույցը տեղի է ունեցել ադրբեջանական կողմի նախաձեռնությամբ, նրանք պայմանավորվել են շարունակել կանոնավոր շփումները տարբեր մակարդակներով:

Ադրբեջանագետ Գրիգորի Այվազյանի խոսքով՝ պետք  է հիշել, թե ինչ ֆոնի վրա է տեղի ունեցել զրույցը.

«Այսպիսի հարցերը չի կարելի քննարկել առանց ֆոնի դիտարկման, իսկ ֆոնը պարզ է։ Մոսկվայում բավականաչափ դժգոհ են Հայաստանի ու Ադրբեջանի միահամուռ ջանքերից՝ դուրս բերելու հայ-ադրբեջանական հարաբերությունների հարցը, արցախյան հիմնախնդիրը Մոսկվայի վերահսկողությունից և միջնորդական ջանքերից։ Դա է վկայում նաև անընդհատ հայ-ադրբեջանական, այսպես կոչված, Բրյուսելյան հանդիպումների ֆորմատը, որը նոր է ծագել և միտում ունի շարունակական բնույթ կրելու։

Ռուսաստանն իր համար բավականին լուրջ եզրակացություն են արել, որ Հայաստանը և Ադրբեջանը փորձում են այդ ամբողջ խնդիրը տեղափոխել եվրոպական հարթակ և դրանով իսկ մատնանշել Հայաստանի համար նոր աշխարհաքաղաքական կողմնորոշման փաստագրումը։ Ադրբեջանն էլ փորձում է լավ դիրք պահպանել՝ մի կողմից ամբողջությամբ «փռվելով ասֆալտին» Եվրոպայի առջև, ակնարկներ անելով, որ Ադրբեջանը պատրաստ է այլընտրանք դառնալ Ռուսաստանի փոխարեն Եվրոպայի համար, տարանցիկ ճանապարհ ծառայել, միայն թե Եվրոպան բավարարի ֆաշիստական ադրբեջանական ռեժիմի անկուշտ նկրտումները՝ կապված Արցախի և արդեն Հայաստանի Հանրապետության տարածքների նկատմամբ»,- 1or.am-ի հետ զրույցում ասաց Այվազյանը:

Ադրբեջանագետի խոսքով՝ դրա մասին են վկայում նաև Ադրբեջանի բռնապետի վերջին հայտարարությունները.

«Եթե հիշում ենք Ալիևի վերջին հայտարարությունն այն մասին, որ իրենք արդեն հասել են սահմանազատման գործողություններին, ինչ Արցախի մասին կարող է խոսք գնալ։ Այնպես որ, մենք չպետք է ակնկալենք լավ բան Ալիևի ջանքերից, ով փորձում է մի կողմից ավելի թանկ վաճառվել Եվրոպային, մյուս կողմից Հայաստանին սևացնելով ցույց տալ, իբրև թե Ադրբեջանը դեպի Ռուսաստան իր կողմնորոշումը չի կորցրել։ Մինչդեռ Ռուսաստանում էլ գիտեն, որ Ադրբեջանն ունի դեպի ՆԱՏՕ կողմնորոշում, և փաստացի արդեն ՆԱՏՕ-ի ոչ պաշտոնական անդամ է և երևի թե միակ պետությունն է, որի տարածքում ՆԱՏՕ-ական ներկայությունը օրինականացվեց՝ ի դեմս Թուրքիայի»։

Մարիամ Նալբանդյան