Մոնումենտի շուրջ գործընթացները սպառնում են ներիշխանական պայքարի վերածվել

 Հայաստանի գլխավոր դատախազության և հակակոռուպցիոն կոմիտեի միջև ծայր առած վիճաբանությունը, Մոնումենտում նախկին վարչապետ Հովիկ Աբրահամյանի առանձնատան վաճառքի շուրջ, առաջիկայում կարող է ավելի սրվել։ Պարզվում է, որ այդ տարածքում իր առանձնատունը վաճառել է ոչ միայն Հովիկ Աբրահամյանը, այլև մի քանի այլ նախկին պաշտոնյաներ՝ չնայած քրեական գործերին։ Սիվիլնեթը պարզել է, որ բացի Աբրահամյանների ընտանիքին պատկանող առանձնատնից, նմանատիպ սխեմաներով արգելանքներից ազատվել և վաճառել են նույն տարածքում գտնվող նախկին բարձրաստիճան պաշտոնյաների այլ հողամասեր ևս։

ՀՀԿ խմբակցության նախկին պատգամավոր գեներալ Սեյրան Սարոյանը իրեն պատկանող հողամասը վաճառել է Ռուսաստանում բնակվող մի գործարարի երկու որդիներին։ Աներոջն էլ իր հողամասն է վաճառել ներկայումս կալանքի տակ գտնվող նախկին գլխավոր դատախազ Աղվան Հովսեփյանի որդին՝ Արմեն Հովսեփյանը։

Բոլոր այս դեպքերում հողամասերն ու առանձնատները գտնվել են կալանքի տակ, և հակակոռուպցիոն կոմիտեի քննիչների ջանքերի արդյունքում դրանք հանվել են արգելանքից և վաճառվել են, թեպետ դատախազությունը հստակ հրահանգ է ունեցել ամեն գնով իրավական գործընթցներ իրականացնել։ Ընդ որում, տարակուսելին այն է, որ գլխավոր դատախազի պաշտոնը զբաղեցնում է նախկիններից մնացած Արթուր Դավթյանը, իսկ հակակոռուպցիոն կոմիտեն «սորոսական» շրջանակների հետ սերտ առնչություն ունեցող և հեղափոխությունից հետո պաշտոնի մշանակված՝ Սասուն Խաչատրյանը։

Լրատվամիջոցների տեղեկություններով այսպիսի դեպքերը շատ ավելին են և առաջիկայում դրանց մասին տեղեկություններ կհաղորդվեն։ Իսկ մինչ այդ հակակոռուպցիոն կոմիտեն ու գլխավոր դատախազությունը իրար են գզում՝ հաշվի չառնելով որևէ հանգամանք։ Դատախազությունն, օրինակ, օրեր առաջ հակակոռուպցիոն կոմիտեի քննիչին հեռացրել էր գործի քննությունից՝ ապօրինի գնահատելով նրա գործողությունները։ Հակակոռուպցիոն կոմիտեն անմիջապես հայտարարություն էր տարածել՝ ապօրինի որակելով գլխավոր դատախազության որոշումը։ Առաջիկայում այս երկու կառույցների հարաբերությունները ավելի են սրվելու, և հանրությունը հերթական գզվռտոցի ականատեսն է դառնալու։

Հակոբ Ոսկանյան