Արևմուտքն անցել է լայն ճնշման Հայաստանի դեմ

Ռուս-ուկրաինական պատերազմի հանգուցալուծմանն ընդառաջ, եվրոպական պետություններն ու Միացյալ Նահանգները, ակտիվացնում են իրենց գործունեությունը Հայաստանում։ Զարմանալիորեն երկու կանայք՝ Միացյալ Նահանգների դեսպան Լին Թրեյսին և Ֆրանսիայի դեսպան Ան Լույոն բավական ակտիվ են վերջին շրջանում։ Եթե Լին Թրեյսին զբաղված է Հայաստանի Հանրապետությանը պարտադրելով արևմտյան կողմնորոշումների իր տեսլականը, փորձում է Հայաստանին հետ պահել չեզոք դիրքորոշումից և պարտադրել ընտրել կա՛մ Ռուսաստան, կա՛մ Հայաստան, Ֆրանսիայի դեսպանը ավելի նրբորեն է գործում։

Տիկինը վերջին օրերին հանդիպումներ է ունեցել թե՛ նախագահականում, թե՛ պաշտպանության նախարարությունում՝ քննարկելով հայ-ադրբեջանական սահմանագծին տեղի ունեցող միջադեպերը, դրանց հակազդելու, Ադրբեջանի ակտիվացումը կանխելու հարցերը։ Ըստ էության, դեռևս օրեր առաջ, երբ Հայաստանի իշխանությունները դիմեցին ԵԱՀԿ Մինսկի համանախագահությանը՝ կոչ անելով ակտիվացնել իրենց ջանքերը, Մինսկի խմբի շրջանակներում ղարաբաղյան հիմնախնդիրները կարգավորելու ուղղությամբ, պարզ էր, որ այդ կոչը ուղղված է ոչ այնքան Ռուսաստանին, որով այս օրերին զբաղված է Ուկրաինայի տարածքում իր ռազմական գործունեությամբ, այլ ավելի շուտ Ֆրանսիային և Միացյալ Նահանգներին։ Այդ երկու երկրների դեսպաններն էլ, իհարկե, սեփական իշխանությունների գիտությամբ և գոտեպնդմամբ, լուրջ դիվանագիտական ջանքեր են գործադրում Հայաստանի Հանրապետությունը Ռուսաստանի ազդեցության տիրույթից հանելու, արևմտյան կցորդի վերածելու։

Արևմտամետ զանգվածի մոտ այս հանգամանքը կարող է լուրջ ուրախություն առաջացնել։ Այնուամենայնիվ փաստենք, որ Հայաստանը այդ պետություններին պետք է ոչ թե Հայաստանի Հանրապետություն՝ հարևանների հետ ունեցած խնդիրներով, այլ ընդամենը, «պլաստարմ» Ռուսաստանի վրա իր տնտեսական և քաղաքական հարձակումները գործելու, ինչպես նաև Հարավային Կովկասը Ռուսաստանի ազդեցությունից դուրս բերելու առումով։ Եվ Հայաստանի իշխանությունները, փաստորեն, խաղում են այս նույն խաղը՝ փորձելով Ռուսաստանի թուլանալուն զուգահեռ նաև դուրս մղել Ռուսաստանին։ Իսկ թե ի՞նչ կլինի Հայաստանի հետ, Արցախի տարածքից ռուս խաղաղապահների, իսկ Հայաստանից 102-րդ ռազմաբազան դուրս բերելու դեպքում, ո՛չ դեսպաններին, ո՛չ էլ առավել ևս փաշինյանական իշխանությանը չի հետաքրքրում։

Արմեն Երեմյան