Պատերազմը՝ հնարավորություն․ արդյո՞ք իշխանությունը բավարար կամք կունենա

Ռուս-ուկրաինական պատերազմը ոչ միայն մարտահրավեր ու սպառնալիք կարող է դառնալ Հայաստանի և Արցախի համար, այլ նաև հնարավորություն նոր քաղաքական և տնտեսական դիվիդենտներ ստանալու համար։ Երեկ Հայաստանի արտգործնախարար Արարատ Միրզոյանը հեռախոսազրույց է ունեցել Ֆրանսիայի իր պաշտոնակից Ժան-Իվ Լը Դրիանի հետ, քննարկել են մի շարք հարցեր, այդ թվում նաև խաղաղության պայմանագրի շուրջ Հայաստանի և Ադրբեջանի միջև բանակցություններ սկսելուն վերաբերող հարցերը։

Հայաստանի արտգործնախարարությունը անցած շաբաթ էր հայտարարել, որ դիմելու է ԵԱՀԿ Մինսկի խմբի համանախագահությանը Բաքվի հետ խաղաղության բանակցություններ նախաձեռնելու հարցով։ Միրզոյանը Ֆրանսիայի արտգործնախարարին ներկայացրել է Հայաստանի հետ սահմանագոտու և Լեռնային Ղարաբաղում Ադրբեջանի կողմից սադրանքների և հրադադարի ռեժիմի շարունակական խախտումների հետևանքներով ստեղծված իրավիճակը, քաղաքացիական բնակչությանը թիրախավորելու, հոգեբանական ճնշումներ գործադրելու փաստերը։ Նախօրեին էլ Ֆրանսիայի արտգործնախարարը հեռախոսազրույց էր ունեցել Ադրբեջանի արտգործնախարար Ջեյհուն Բայրամովի հետ։ Ադրբեջանի ԱԳՆ-ի տարածած հակիրճ հաղորդագրության մեջ նշվում է, թե արտգործնախարարները բարձրացրել են Ադրբեջանի կողմից ներկայացված 5 կետերի հարցը։ Այս կետերը, որոնք անընդունելի է համարում Հայաստանի արտգործնախարարությունը, լուրջ վտանգ են պարունակում թե՛ Հայաստանի, թե՛ Արցախի համար։ Եվ, ըստ էության, Միրզոյանի և Լը Դրիանի բանակցությունները նաև միտված էին այս հարցում որոշակի եվրոպական աջակցություն ստանալու համար։

Հիշեցնենք, որ Ֆրանսիայում առաջիկայում նախագահական ընտրություններ են կայանալու երկու փուլով, ապրիլի 10-ին և 24-ին։ Մասնակից 12 թեկնածուների մեջ առաջատար է համարվում գործող նախագահ Էմանուել Մակրոնը, որը սակայն դեռ հստակ հաղթանակ չի տոնել, և Հայաստանին այժմ անհրաժեշտ է, որպեսզի նա կարողանա հաղթանակ տանել և շարունակել իր աջակցությունը Հայաստանին։ Քաղաքականից բացի ուկրաինական պատերազմը նաև տնտեսական հնարավորություններ կարող է բերել Հայաստանին, ինչից, ի դեպ, անհանգստանում են Ադրբեջանում։ Մասնավորապես Ադրբեջանի ինտերնետ ֆորումի նախագահ Օսման Գյունդուզը հայտարարել է, որ Ուկրաինայում պատերազմի հետևանքով 1 միլիոն ՏՏ ոլորտի մասնագետներ մտածում են միգրացիայի մասին։

«Մեր ունեցած տվյալներով ավելի հաճախ մասնագետները գնում են Հայաստան, Վրաստան։ Հայաստանում այդ մարդկանց գործունեությունը, որոնք բավական գիտելիքներ և հմտություններ ունեն մեզ համար ապագայում կարող է սպառնալիք դառնալ»,- ասել է Ադրբեջանի ներկայացուցիչը։ Սա ևս մեկ անգամ ապացուցում է, որ պատերազմը ոչ միայն վտանգներ է պարունակում, այլ նաև հնարավորություններ։ Կկարողանա՞ արդյոք փաշինյանական վարչակազմը օգտվել այդ հնարավորություններից, բարդ է ասել, թերևս պետք է նրանց նաև ստիպել, որպեսզի ջանք շատ թափեն այդ ուղղությամբ։

Միհրան Ավանեսյան