Վտանգավոր զարգացումներ արցախյան հարցում
ՎԵՐԼՈՒԾՈՒԹՅՈՒՆՆԵՐ
«Պաշտոնական Մոսկվան ողջունում է Բաքվի հետ Երևանի պատրաստակամությունը` սկսել «Խաղաղ պայմանագրի» նախապատրաստումը և պատրաստ է օժանդակել բանակցային գործընթացին»,- հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան։ «Մենք ողջունում ենք Ադրբեջանի և Հայաստանի միջև «Խաղաղ պայմանագրի» նախապատրաստումը սկսելու Բաքվի և Երևանի պատրաստակամությունը և վերահաստատում ենք մեր օժանդակելու տրամադրվածությունը»,- նշել է նա, միաժամանակ հավելել, թե առայժմ վաղ է խոսել «Խաղաղ պայմանագրի» ստորագրման ժամկետների մասին։ «Խաղաղ պայմանագրի» վերաբերյալ ընդամենը օրեր առաջ հայտարարել էր Հայաստանի արտգործնախարարությունը։
Պատասխանելով Ադրբեջանի ներկայացրած 5 վերջնագրային կետերին` Հայաստանի ԱԳՆ-ն դիվանագիտական լեզվով մերժել էր դրանք և դիմել ԵԱՀԿ Մինսկի խմբի համանախագահներին՝ «Խաղաղության պայմանագրի» շուրջ բանակցություներ սկսելու վերաբերյալ։ Ըստ էության, Մարիա Զախարովայի այս հայտարարությունը ոչ այլ ինչ է, քան ոչ դիվանագիտական ապտակ Հայաստանի արտգործնախարարության դեմքին։ ԵԱՀԿ Մինսկի խմբի առանցքային անդամներից մեկը, որ նաև Հայաստանի Հանրապետության ռազմավարական գործընկերն ու դաշնակիցն է, ըստ էության, գործող իշխանություններին բացատրում է նրանց իրական տեղն ու դերը։
Հայաստանի անատամ պահվածքը լկտիանալու հերթական առիթն է տվել նաև Բաքվի բռնապետին։ Իլհամ Ալիևն ասել է, որ 2020 թվականի աշնանը Ադրբեջանը պահպանում էր ռազմական գործողություններ իրականացնելու բոլոր կանոնները և չէր կռվում խաղաղ բնակչության դեմ։
«Մենք պատերազմում էինք արժանապատվորեն, պահպանում էինք պատերազմի բոլոր կանոնները, չէինք կռվում քաղաքացիական անձանց դեմ, չէինք ռմբակոծում շենքերը, չէինք գործում նման վայրագություններ, չնայած այն բանին, որ վրեժխնդրության ծարավը միշտ ապրել է մեր ժողովրդի սրտում։ Ի վերջո, հայերը ցեղասպանություն էին իրականացրել մեր ժողովրդի նկատմամբ, էթնիկ զտումների քաղաքականություն էին վարում, ուստի վրեժխնդրության զգացմունքը արդարացված էր։ Բայց ես միշտ ասում էի, որ մենք թշնամու հետ հաշիվները կմաքրենք մարտադաշտում»,- ասել է Ալիևը։ Լկտի այս ստին Հայաստանի իշխանությունները, բնականաբար, որևէ բառով չեն պատասխանել։
Սարգիս Սարիբեկյան
