Արարատ Միրզոյանը կգնա Անթալիա, բայց ոչ լողանալու

Հայաստանի արտաքին գործերի նախարար Արարատ Միրզոյանը կմասնակցի Անթալիայի դիվանագիտական ֆորումին։ Այս մասին հայտնել է ԱԳՆ խոսնակ Վահան Հունանյանը: Անթալիայի ֆորումը կկայանա մարտի 11-13-ը: Այս միջոցառմանը Թուրքիան հրավիրել է Հայաստանի ԱԳ նախարար Արարատ Միրզոյանին և հայ-թուրքական բանակցություններում Հայաստանը ներկայացնող Ռուբեն Ռուբինյանին: Ռուբինյանի այցի վերաբերյալ առայժմ որևէ հաղորդագրություն չկա, սակայն Միրզոյանի մասնակցության հաստատումն էլ վկայում է, որ հայ-թուրքական գործընթացում ինչ-որ խորքային և խնդրահարույց զարգացումներ են ընթանում։

Նախօրեին Բաքու էր այցելել Թուրքիայի ԱԳ նախարար Մևլութ Չավուշօղլուն, իսկ այցի ընթացքում նրան ուղեկցում էր հայ-թուրքական բանակցային գործընթացում Թուրքիայի բանագնաց Սերդար Քըլըչը։ Չավուշօղլուն Բաքվում խոսել է նաև Թուրքիայի ու հարևանների հարաբերությունների մասին՝ հայտարարելով, որ Անկարան նպատակ ունի բոլորի հետ բարիդրացիական հարաբերություններ հաստատել և համագործակցել: Ադրբեջանի ԱԳ նախարար Ջեյհուն Բայրամովն էլ հաստատել է, թե Չավուշօղլուի հետ քննարկել են հայ-ադրբեջանական հարաբերությունների կարգավորման ընթացքը, անդրադարձել նաև Անկարա-Երևան հարաբերությունների կարգավորման բանակցային գործընթացին:

«Ադրբեջանը աջակցում է հայ-թուրքական հարաբերությունների կարգավորման գործընթացին և շարունակելու է աջակցել: Թուրքիան ու Ադրբեջանը Հայաստանին ուզում են ցույց տալ մեր նպատակը՝ այն է՝ տարածաշրջանում բարիդրացիական հարաբերություններ ստեղծել: Հայաստանի համար սա հնարավորություն է: Հայաստանի քաղաքական ու ռազմական ղեկավարությունը պետք է որոշի՝ ինչքանով օգտագործել ընձեռված հնարավորությունը: Ադրբեջանն ու Թուրքիան այս գործընթացում միասին են գործում, խորհրդակցություններ ունենում: Մեր համագործակցությունը երրորդ երկրի դեմ ուղղված չէ: Երբ Հայաստանի ղեկավարությունն ու հանրությունը գիտակցեն, որ այն, ինչ լավ է Ադրբեջանի և Թուրքիայի համար, չպետք է վատ լինի Հայաստանի համար, այդ ժամանակ էլ կարգավորման գործընթացները ավելի հեշտ ու արագ առաջ կգնան», - հայտարարել է Բայրամովը:

Հայաստանի և գործող վարչախմբի նկատմամբ հանկարծահաս բուսնած այս սերը, Հայաստանին արվող ռևերանսները, խաղաղության հորդորները բնավ էլ Հայաստանի շահերից չեն բխում։ Ի վերջո, գործ ունենք ընդամենը մեկուկես տարի առաջ Հայաստանի վրա հարձակված տանդեմի հետ, որի միակ նպատակը Հայաստանին ամեն գնով ոչնչացնելն է։ 

Ռաֆայել Ալեքսանյան