Գրպանային նախագահին առաջին փուլով չընտրեցին

Հայաստանի խորհրդարանը երեկ քննարկում էր Հայաստանի Հանրապետության նախագահի պաշտոնում «Քաղաքացիական պայմանագիր» կուսակցության առաջադրած թեկնածուի՝ Բարձր տեխնոլոգիական արդյունաբերության նախարար Վահագն Խաչատուրյանի թեկնածությունը։ Փակ, գաղտնի քվեարկությունից հետո արդյունքները չհրապարակվեցին, դրանք հայտնի դարձան միայն այսօր առավոտյան։ Ըստ այդմ ինչպես և կանխատեսելի էր Վահագն Խաչատուրյանին չհաջողվեց առաջին փուլով ընտրվել Հայաստանի Հանրապետության նախագահ։ Անհրաժեշտ կլինի երկրորդ փուլ իրականացնել, երբ ընտրության համար հարկավոր է ոչ թե 81, այլ ընդամենը 64 պատգամավորների կողմ քվեարկելը։ Քաղաքացիական պայմանագիրը ունի ընդամենը 71 պատգամավոր։

Ընդդիմությունը՝ «Հայաստան» և «Պատիվ ունեմ» խմբակցությունները, ավելի վաղ հայտարարել էին, թե բոյկոտելու են նախագահի ընտրության գործընթացը և չեն մասնակցելու ո՛չ քննարկումներին, ո՛չ էլ քվեարկությանը։ Երեկ էլ ապացուցվեց, որ ընդդիմությունն այս հարցում ևս ճիշտ է վարվել՝ չմասնակցելով իշխանության սրտի թեկնածուի առաջադրմանն ու թեկնածության քննարկմանը։

Հայաստանի նախկին նախագահ Արմեն Սարգսյանը հրաժարականի իր տեքստում նշել էր, թե չունի բավարար գործիքներ և քաղաքական լծակներ՝ ազդելու Հայաստանի առջև ծառացած խնդիրների լուծման վրա։ Վահագն Խաչատուրյանը երեկ իր ունեցած ելույթում ապացուցեց, որ քաղաքական որևէ ֆիգուր չէ, ընդհակառակը, կատարելու է այն, ինչ իրենից պահանջում է Փաշինյանը։ Իսկ Նիկոլ Փաշինյանը կառավարության նիստերից մեկում հայտնել էր, որ չափազանց կարևոր է, որ հանրապետության նախագահը ներդաշնակ գործի գործադիր և օրենսդիր իշխանությունների հետ։

Վահագն Խաչատուրյանը նշել է, թե անկուսակցական է և նախագահ դառնալու դեպքում քաղաքական հայտարարություններ չի կարող անել։ Առավել անհեթեթ պնդում, քան այս պնդումն է, անհնար է նույնիսկ պատկերացնել։ Հանրապետության նախագահը անկախ նրանից, որ Սահմանադրությամբ բավականին նվազ լիազորություններ ունի, ի պաշտոնե համարվում է երկրի գլուխը և համապատասխան լծակներ ունի միջամտելու քաղաքական որոշակի գործընթացներին, Հայաստանի առջև ծառացած մարտահրավերներին արձագանքելու առումով։ Մինչդեռ նա ամեն գնով խուսափեց քաղաքական բնույթի հարցադրումներից, այն էլ սեփական կուսակցության և լրագրողների կողմից։ Ընդդիմությունը նրան որևէ հարց չհղեց, քանի որ ընդդիմադիր պատգամավորները չէին գտնվում խորհրդարանում։ Ըստ երևույթին, երկրորդ փուլում ևս ընդդիմությունը չի մասնակցի քննարկումներին և կարճ ելույթներից հետո իշխանությանը կհաջողվի Վահագն Խաչատուրյանին դարձնել Հայաստանի Հանրապետության նախագահ։ Իսկ թե այս նշանակումով ինչ կշահի Հայաստանի Հանրապետությունը հստակ է. ոչինչ։ Հայաստանի Հանրապետությունը ունենալու է ընդամենը «Քաղաքացիական պայմանագիր» կուսակցության և Նիկոլ Փաշինյանի գրպանային նախագահ, որը զբաղված է լինելու միայն իշխանության անհրաժեշտ օրենքները դակելով և Փաշինյանի առաջադրած թեկնածուներին տարբեր պաշտոնների նշանակելով։

Արամ Մակարյան