Փաշինյանը շատ է նեղվել «ազգակործան պատուհաս» որակումից

«Շանթ դաշինք» կուսակցության նախագահ Շահեն Հարությունյանի Շանթ Հարությունյանի որդու դեմ քրեական գործ է հարուցվել Նիկոլ Փաշինյանին «ծանր վիրավորանք» հասցնելու համար։ Շահեն Հարությունյանը ֆեյսբուքյան իր էջում կիսվել է Նիկոլ Փաշինյանի գրառմամբ և գրել՝ «Ազգակործան պատուհաս Նիկոլ Փաշինյանի հերթական հայրենիքի դավաճանությունը ու անարժանապատվության դրսևորումը»։ Քննչական կոմիտեն այս գնահատականները որակել է որպես Նիկոլ Փաշինյանի հասցեին «ծանր վիրավորանք» ու քրեական գործ հարուցել։ Ընդ որում, եթե բազմաթիվ այլ դեպքերում քրգործեր հարուցվել են Փաշինյանի կամ նրա կողմնակիցների հասցեին սեռական բնույթի հայհոյանքների համար, Շահեն Հարությունյանի դեմ քրգործը հարուցվում է առաջին նախագահ Լևոն Տեր-Պետրոսյանի գնահատականը կիսելու համար։ Հարությունյանը դեռ մեղադրյալ չէ, նյութերի նախապատրաստումը շարունակվում է։

Տարօրինակն այս ամենում այն է, որ օրենքով պետք է լինի տուժող, ով դիմի իրավապահ մարմիններին, բացատրի, թե ինչից է նեղվել, որն է համարում «ծանր վիրավորանք», որից հետո քննչական մարմինները սկսեն նյութեր նախապատրաստել։ Նիկոլ Փաշինյանը կամ նրա աշխատակազմը այս գործով տուժող չեն, որպես վիրավորված հանդես է գալիս ոստիկանությունը։ Քրեական օրենսգրքի «ծանր վիրավորանքի» հոդվածն ի սկզբանե նախատեսվում էր որպես մահակ գործող վարչախմբի ընդդիմադիրների դեմ։ Փաշինյանական վարչախումբն առիթը բաց չի թողնում այն օգտագործելու, տարբեր մարդկանց ձերբակալելու, կալանավորելու կամ հետապնդելու համար։ Նույնիսկ իշխանությանը մերձ իրավապաշտպաններն են քննադատել այդ օրենքի ներմուծումը, նշել, որ դա հակաժողովրդավար քայլ է, իսկ ժողովրդավարությունը, ինչպես Փաշինյանն էր ասում, «իրենց իշխանության բրենդն է»։

Ծանր վիրավորանքի հոդվածով նախատեսված է պատիժ՝ առավելագույնը մինչև 3 միլիոն դրամ տուգանք կամ ազատազրկում՝ մինչև երեք ամիս ժամկետով: Մինչ այս պահը մեկ դատավճիռ կա Նիկոլ Փաշինյանի և Բարձր տեխնոլոգիական արդյունաբերության նախկին նախարար Վահագն Խաչատուրյանին հայհոյելու գործով, մեղադրյալը տուգանվել էր կես միլիոն դրամով։ Հունվարի 1-ի դրությամբ, հարուցվել է 263 քրեական գործ, որից 25-ը կարճվել է, 5-ի վարույթը կասեցվել։ Մեղադրանք է առաջադրվել 31 անձի: Մեղադրական եզրակացությամբ դատարան է ուղարկվել 8 քրեական գործ։

Կառլեն Գևորգյան