Հանձնաժողով՝ հետաքննությունը շեղելու նպատակով

Ազգային ժողովում ստեղծվել է 44-օրյա պատերազմի հանգամանքներն ուսումնասիրող քննիչ հանձնաժողով։ 8-րդ գումարման խորհրդարանը դեռ կազմավորվելուց հետո էր հայտնել հանձնաժողով ստեղծելու մտադրության մասին, սակայն Պաշտպանության և անվտանգության հարցերի հանձնաժողովը ամիսներ շարունակ զբաղված էր ոչ թե պատերազմի հանգամանքների ուսումնասիրմամբ կամ այդ գործին ձեռնամուխ լինելով, այլ հանձնաժողովի փոխնախագահի պաշտոնի անպտուղ քննարկումներով։ Հանձնաժողովն այդպես էլ փոխնախագահ չընտրեց, իսկ հիմա անցնելու է պատերազմի հետաքննությանը։

Հանձնաժողովը կարող է պահանջել ու ստանալ պաշտպանական ոլորտին առնչվող, այդ թվում՝ գաղտնի փաստաթղթեր, հրավիրել պաշտոնյաների, ինչպես նաև անձանց, որոնք պատերազմի վերաբերյալ տեղեկություններ կարող են հայտնել։ Քննիչ հանձնաժողով հրավիրված պաշտոնատար անձինք պարտավոր են ներկայանալ հանձնաժողով, իսկ մյուս հրավիրյալները կարող են և չգալ։ Տարօրինակն այս ամենում այն է, որ քննիչ հանձնաժողով սովորաբար ստեղծում են ընդդիմադիր ուժերը, որոնք այլ իրավական մեխանիզմներ չեն ունենում այս կամ այն հարցը քննարկելու, խնդիրները վերհանելու առումով։

Քննիչ հանձնաժողովի կազմում լինելու են «Քաղաքացիական պայմանագրից» Անդրանիկ Քոչարյանի ղեկավարած Պաշտպանության և անվտանգության հարցերի մշտական հանձնաժողովի անդամները։ 11 հոգանոց հանձնաժողովի անդամների գերակշիռ մեծամասնությունը՝ 7-ը իշխանական ՔՊ-ի անդամներ են, ընդդիմադիր «Հայաստանը» 3 անդամ ունի, «Պատիվ ունեմ»-ը՝ 1։ Ընդդիմադիր «Պատիվ ունեմ» խմբակցությունն արդեն իսկ հայտարարել է, թե չի մասնակցի հանձնաժողովի աշխատանքներին, իսկ «Հայաստանը դեռ որոշում չունի։

Ընդդիմության գլխավոր մտահոգությունն այն է, որ հանձնաժողովը ամեն ինչ կանի Նիկոլ Փաշինյանի թիմին պատասխանատվությունից ազատելու ու նաև նախկիններին մեղավոր կարգելու համար։ Թերևս, հանձնաժողովը հենց այդ նպատակով էլ ստեղծվում է, որպեսզի քավության նոխազներ կարգի այլոց, իսկ մեղքը հեռացնի Փաշինյանի ու նրա թիմի վրայից։ 44-օրյա պատերազմից հետո մի քանի հազար քրեական գործեր են հարուցվել, որոնք բացառապես բանակի, զինվորականության դեմ են։ Աղմկահարույց մի շարք գործերով արդեն իսկ ակնհայտ է, որ իշխանությունը չունի որևէ ապացույց, փոխարենը փորձում են կոտրել մարդկանց, զինվորականներին, նախկին ռազմագերիներին։ Առաջիկայում դատախազության և ԱԱԾ-ի ապօրինություններին կմիանա նաև Անդրանիկ Քոչարյանի գլխավորած հանձնաժողովը։

Միհրան Սարգսյան