Սոցհարցումները՝ խուճապի առիթ փաշինյանական թիմում

Միջազգային հանրապետական ինստիտուտը (IRI) երեկ հրապարակել է սոցհարցման արդյունքները, որ իրականացվել էր անցած տարեվերջին։ Այդ հարցման արդյունքները, ի դեպ, լուրջ մտահոգությունների տեղիք են դարձել իշխող թիմի կազմում։ Ընդ որում, բնակչության 46 տոկոսը կարծում է, որ երկիրը գնում է սխալ ուղղությամբ, հակառակ կարծիքի է ընդամենը 34 տոկոսը։ Վարչապետի աշխատակազմի աշխատանքը լիովին դրական են գնահատել հարցվածների 19, մասամբ դրական՝ 30 տոկոսը, մինչդեռ պետական կառույցների մեջ ամենաբարձր վարկանիշն ունի Մարդու իրավունքների պաշտպանի գրասենյակը։ Այս հանգամանքը, ի դեպ, բացառապես Արման Թաթոյանի շնորհքն է։ Արդեն փետրվարի 23-ից նոր օմբուդսմեն կունենանք, և այդ կառույցի վարկանիշն էլ կհավասարվի մյուսներին։ 

Ամենացածր վարկանիշը պետական կառույցների շարքում, ըստ հարցման, ունեն Սահմանադրական դատարանը, Բարձրագույն դատական խորհուրդն ու ցանկը եզրափակող Ազգային ժողովը։ Կանխատեսելի էր, որ Ազգային ժողովը չի կարողանալու դառնալ իրապես լուրջ մարմին, սակայն, թերևս, առաջին դեպքն է, երբ Ազգային ժողովն այսքան ցածր վարկանիշ ունի հանրության շրջանում։ 

Ի հեճուկս փաշինյանական իշխանությունների վարած քաղաքականության, հակառակ պատկերն է նաև մյուս առումներով։ Հարցվածների 90 տոկոսը Թուրքիային լրջագույն սպառնալիք է համարում Հայաստանի համար, Ադրբեջանին նման գնահատական է տվել հարցվածների 77 տոկոսը։ Հանրության մեծ մասը նաև չի հավատում, որ ապաշրջափակումը տնտեսական օգուտներ կարող է տալ Հայաստանին։

Արցախի հարցում էլ ուշագրավ պատկեր է ստացվել։ Հարցվածների 82 տոկոսը կարծում է, որ ղարաբաղյան հակամարտության կարգավորումը շատ կարևոր է առաջիկա տասը տարում Հայաստանի ապագայի համար։ Հարցվածների 35 տոկոսը կարծում է, որ ընդունելի տարբերակ է Լեռնային Ղարաբաղի՝ որպես անկախ պետության ճանաչումը։ 34 տոկոսի կարծիքով՝ ընդունելի տարբերակ է Լեռնային Ղարաբաղի միացումը Հայաստանին՝ որպես շրջան։ Հայաստանի կազմում Լեռնային Ղարաբաղի՝ որպես ինքնավար շրջանի կարգավիճակի հաստատման օգտին է հանդես եկել հարցվածների 16 տոկոսը․ իսկ Ռուսաստանի կազմում Լեռնային Ղարաբաղի կարգավիճակի հաստատման մասին նշել է հարցվածների 11 տոկոսը։

Ըստ էության, հանրությունը բավական լավ է գնահատում իրողությունները՝ ի տարբերություն գործող իշխանությունների։ ՀՀԿ փոխնախագահ Արմեն Աշոտյանի գնահատմամբ, իշխանափոխության համար կա պարարտ հող, մնացածը՝ ընդդիմության խնդիրն է։

Սամսոն Մելիքյան