Նիկոլ Փաշինյանը չի վստահում այլ ուժերի․ ինչպե՞ս վարկաբեկել նախագահի ինստիտուտը

Հայաստանի նախագահի պաշտոնից Արմեն Սարգսյանի հրաժարականից հետո բազմաթիվ անուններ էին շրջանառվում, թե ովքեր կարող են զբաղեցնել այդ պաշտոնը։ Գործող Սահմանադրությամբ, Հայաստանի նախագահը չնչին լիազորություններ և զարգացումների վրա ազդեցության լծակներ ունի, այդուհանդերձ, սկզբունքային և հմուտ գործչի ձեռքում էլ այդ պաշտոնը կարող է լուրջ գործոն լինել, հակակշռումների և զսպումների առհավատչյա լինել։ Նախագահի պաշտոնը առանցքային է յուրաքանչյուր երկրի համար, նույնիսկ խորհրդարանական կառավարմամբ, և այն պետք է զբաղեցնի հանրության մեջ մեծ հեղինակություն ունեցող, ազդեցիկ գործիչ։ Սարգսյանի հրաժարականը վարչապետի պաշտոնը զբաղեցնող Նիկոլ Փաշինյանը մեկնաբանել էր հաջորդ իսկ օրը, հայտարարել էր, թե նախագահի թեկնածուի հարցը իր քաղաքական թիմի հետ դեռ չի քննարկել, միաժամանակ նշել էր` «Քաղաքացիական պայմանագիր» խմբակցությունն է, որ պետք է ընտրի ՀՀ նախագահ. «Կարծում եմ` մենք պետք է գնանք այնպիսի լուծումների, որ հանրապետության նախագահի, կառավարության և խորհրդարանական մեծամասնության միջև լինի քաղաքական ներդաշնակություն»:

 

Այս հայտարարությամբ Նիկոլ Փաշինյանը հնարավոր և ինքնառաջադրվող բոլոր թեկնածուներին տեղեկացնում էր, որ հույս չունենան նախագահի պաշտոն զբաղեցնել։ ԶԼՄ-ների տեղեկություններով՝ նախագահի պաշտոնում «Քաղաքացիական պայմանագիրը» մտադիր է առաջադրել հնարավոր ամենավատ թեկնածուին՝ վարչապետի աշխատակազմի ղեկավար Արայիկ Հարությունյանին։ Իսկ աշխատակազմի ղեկավարի պաշտոնում նրան կփոխարինի Փաշինյանի օգնական, և, համատեղությամբ, «Շիշ բռնողի» զույգ եղբայր Նաիրի Սարգսյանը։ Մեր աղբյուրի փոխանցմամբ, իշխող թիմում էլ միանշանակ չի ընդունվում Հարությունյանի թեկնածությունը։ ՔՊ-ականներն էլ հասկանում են, որ կրթության և գիտության ոլորտի ամենաձախողակ ղեկավարը ոչ միանշանակ համարում ունի նաև հանրության շրջանում, և նրա նշանակումը լրջագույն հարված կլինի «Քաղաքացիական պայմանագրի», առանց այն էլ խարխուլ վարկանիշին։

 

Փաշինյանը կողմնակիցներին հստակ հասկացրել է, թե չի վստահում այլ, արբանյակ ուժերի ղեկավարներին, որոնցից յուրաքանչյուրն անհրաժեշտ պահին կարող է թռչել իր կողքից, կամ էլ երբեմն-երբեմն դիմադրեն վարչապետի ապօրինի ցանկություններին։ Փաշինյանն այսօր վստահում է բացառապես «Քաղաքացիական պայմանագրի» հին անդամներին, որոնց ցանկից էլ բարձր պաշտոնների են նշանակում։ Արդյունքում, հերթական անգամ վարկաբեկվելու է ՀՀ նախագահի ինստիտուտը, հավասարվելու հողին։ Այդ հանգամանքը, թերևս, չի մտահոգում Նիկոլ Փաշինյանին ու իր թիմին։ Այդ մարդիկ չունեն պետության, պետականության զգացում, իսկ քայլերի տրամաբանությունը միտված է միայն սեփական իշխանությունը ցանկացած, անգամ ստոր եղանակով պահելուն։