Ապակուսակցականացման Փաշինյանի թեորեմը

Սուրեն Պապիկյանը դարձել է ԵՊՀ հոգաբարձուների խորհրդի նախագահ, որպեսզի երաշխավորի բուհի ապակուսակցականացումը։ Այս զավեշտալի հայտարարությունն անցած տարեվերջին արել էր վարչապետի պաշտոնը զբաղեցնող Նիկոլ Փաշինյանը՝ ամփոփիչ ասուլիսում փորձելով հիմնավորել «Քաղաքացիական պայմանագիր» կուսակցության անդամների, տարբեր պաշտոնյաների՝ բուհերի կառավարման խորհուրդների նախագահներ դառնալն ու այդ խորհուրդներում ներկայացված լինելը։ Թե որքանով է ԵՊՀ-ն ապակուսակցականացվել, չարժե նույնիսկ ասել․ մայր բուհում լրիվ թափով կուսակցաշինության աշխատանքներ են ընթանում։

Նախօրեին էլ տեղի է ունեցել «Հայաստանի ազգային պոլիտեխնիկական համալսարան» հիմնադրամի Հոգաբարձուների խորհրդի նոր կազմով անդրանիկ նիստը։ Խորհրդի նախագահ միաձայն ընտրվել է նախկին փոխվարչապետ, «Հայաստանի պետական հետաքրքրությունների ֆոնդ» ՓԲԸ-ի տնօրենների խորհրդի նախագահ Տիգրան Ավինյանը։ Ավինյանի ընտրության դեպքում որևէ պատճառաբանություն չեն ներկայացրել, թերևս համարելով, որ Պապիկյանի պարագայում արված հայտարարությունը վերաբերելի է նաև նախկին փոխվարչապետին։

Նիկոլ Փաշինյանը դեռ 2018թ․ իշխանափոխությունից առաջ բազմիցս քննադատել է բուհերի կուսակցականացումը, խոստացել իշխանության գալուց հետո վերջ դնել այդ արատավոր պրակտիկային։ Գործնականում Փաշինյանը ոչ պակաս ջանքեր է գործադրում պեական ուսումնական հաստատություններն իր կուսակիցներով լցնելու, բուհերի ֆինանսների և վարչական կառավարումն իր ձեռքում պահելու, ռեկտորներին էլ կախման մեջ գցելու ուղղությամբ։ Իհարկե, սա ունի իր տրամաբանական բացատրությունը։ Բուհերը, անկախ ամեն ինչից, նաև քաղաքական դժգոհության օջախ են, իսկ խորհուրդներն էլ հնարավորություն են գործող վարչախմբի համար ակտիվ ուսանողությանը կրնկի տակ պահելու համար։ Այդ առումով, հեղափոխական որևէ գաղափար «հեղափոխական» հորջորջվող թիմից ակնկալել պետք չէ, նրանք անում են այն, ինչ տեսել, սովորել, և պատկերացնում են։

Գարիկ Համբարձումյան