Նիկոլ Փաշինյանն այդպես էլ չաճեց դեղին մամուլի խմբագրի մակարդակից

Հայաստանի վարչապետի պաշտոնը զբաղեցնող Նիկոլ Փաշինյանն այդպես էլ չաճեց դեղին մամուլի խմբագրի մակարդակից, իսկ նրա բարոյական անկումը օրեցօր նոր դրսևորումներ է ստանում։ Ազգային ժողովում երեկ կառավարության հետ հարցուպատասխանի ընթացքում Փաշինյանը կրկին մոռացավ, թե ինչ պաշտոն է զբաղեցնում, աջուձախ զրպարտություններ անելով։ «Հայաստան» դաշինքի պատգամավոր Արթուր Ղազինյանը հիշեցրեց Արցախի մասին ՀՀ-ի և Արցախի ազգային հերոս Մոնթե Մելքոնյանի խոսքերը, որ՝ եթե մենք կորցնենք Արցախը, կշրջենք մեր պատմության վերջին էջը, ապա հիշեցրեց նաև, որ վարչապետ Նիկոլ Փաշինյանն է ասել, թե առանց Արցախի Հայաստան չկա։ Պատգամավորը հետաքրքրվեց՝ Փաշինյանը պատրա՞ստ է վերահաստատել պնդումը։ Ընդդիմադիր պատգամավորի հարցապնդմանը Նիկոլ Փաշինյանի պատասխանն անհնար է արժանապատիվ անվանել։ Հիստերիկ ջղաձգման նոպայի մեջ նա կաշառակերության մեջ սկսեց մեղադրել Ղազինյանի հորը՝ ԵՊՀ իրավաբանական ֆակուլտետի դեկան Գագիկ Ղազինյանին։

«Ցավով կամ գուցե ոչ ցավով արձանագրեմ․ Մոնթե Մելքոնյանն այնքան խելացի չի գտնվել, որ ԵՊՀ-ի պատերի տակ ծվարած, կաշառք հավաքելով՝ միլիոնատեր դառնա, և նա շատ մեծ ժառանգություն է թողել, որպեսզի ոմանք ԵՊՀ ֆակուլտետներից մեկի պատերի տակ ծվարելով՝ 5-10-15-20 կամ ավելի դոլար կաշառք հավաքելով՝ միլիոնատեր դառնան»,- ասաց Փաշինյանը՝ միաժամանակ որևէ կերպ չպատասխանելով Արթուր Ղազինյանի հարցին։

Այն, որ վարչապետի պաշտոնը զբաղեցնող անձը չի գիտակցում, թե ինչ է անմեղության կանխավարկածը, չունի «կարմիր գծեր» և զուրկ է տարրական քաղաքական մշակույթից, նույնիսկ իր կողմնակիցների կասկածը չի հարուցում։ Ղազինյանն, ի դեպ, Փաշինյանին հիշեցրեց, որ նա արդեն տևական ժամանակ ՀՀ վարչապետն է, ու եթե ապացույցներ ունենար, իր խամաճիկ իրավապահներին կհրահանգեր գործ սարքել ընդդիմադիր պատգամավորի հոր նկատմամբ։

Ղազինյանը, նշենք, միակ պատգամավորը չէր, որ հայտնվեց Փաշինյանի ու նրա սպասարկուների թիրախում։ Վարչապետի պաշտոնը զբաղեցնող անձը, որևէ ողջամիտ պատասխան չունենալով ընդդիմության հարցերին, «Հայաստան» և «Պատիվ ունեմ» խմբակցություններին մեղադրում էր ադրբեջանական գործակալ լինելու մեջ։ Այս որակի քաղաքական իշխանությամբ և քաղաքական դաշտով Հայաստանը հեռու գնալ չի կարող, երբ նույնիսկ խորհրդարանը վերածվել է լեզվակռվի և անփաստարկ հայհոյանքների ասպարեզի։

Արշակ Սարիբեկյան