Վահան Քերոբյանին աշխատանքային թրաֆիքինգի՞ են ենթարկում
ՎԵՐԼՈՒԾՈՒԹՅՈՒՆՆԵՐ
Երկնիշ աճ չգրանցելու դեպքում հրաժարական տալու խոստումը կատակ է եղել։ Էկոնոմիկայի նախարար Վահան Քերոբյանն այդ մասին ասել է Ազգային ժողովում, կառավարության հետ հարցուպատասխանի ժամանակ։ «Հայաստան» խմբակցության պատգամավոր Արեգնազ Մանուկյանը հերթական անգամ հետաքրքրվեց նախարարից՝ արդյո՞ք նա պատրաստվում է կատարել իր խոստումն ու հրաժարական տալ։ Պատգամավորն անգամ առաջարկեց միացնել ձայնագրությունը, որտեղ Քերոբյանը տալիս է այդ խոստումը։
«Ձայնագրությունը, որը դուք միացնում եք կիսատ է: Եվ, եթե բարի լինեք ամբողջությամբ միացնել ձայնագրությունը, բոլորի համար պարզ կլինի, որ այդ արտահայտությունը կատակով արված արտահայտություն էր, որովհետև այն կոնտեքստը, որում դա ասվել է, եղել է կատակով արված արտահայտություն: Բայց ես այլ հարց եմ ուզում տալ, արդյո՞ք դուք նույն պատվախնդրությամբ գնում, թակո՞ւմ եք, օրինակ, Արժույթի միջազգային հիմնադրամի, Համաշխարհային բանկի, Ասիական զարգացման բանկի, մյուս բոլոր միջազգային կազմակերպությունների դռները, որոնք նույնպես կանխատեսումներ են արել և վրիպել են իրենց կանխատեսումներով շատ ավելի շատ, քան ես, քան մենք: Արդյո՞ք Ձեր գործողություններում դուք տրամաբանական եք, այսինքն՝ հետևողական եք բոլոր առումներով, թե՞ ուղղակի զվարճանում եք, և Ձեր հայտարարությունները ոչ մի կապ չունեն հայ ժողովրդի խնդիրների հետ»,- ակնհայտորեն խուսանավեց Քերոբյանը:
Նրա փոխարեն ավելի լակոնիկ, բայց լկտի պատասխան է տվել Հայաստանի վարչապետի պաշտոնը զբաղեցնող Նիկոլ Փաշինյանը, ասել, թե ինքն է որոշում, թե ով ինչքան և ինչպես կաշխատի։ «Պարոն Քերոբյանին ես եմ արգելել հրաժարական տալ: Ես կորոշեմ՝ յուրաքանչյուր նախարար ու Կառավարության յուրաքանչյուր անդամ ինչքան կաշխատի»,- ասել է Փաշինյանը։
Սոցցանցերում դրանից հետո իսկական ծաղր է սկսվել Փաշինյանի և նրա կառավարության՝ սեփական խոստումը չկատարող նախարարի հասցեին։ Օգտատերերը նշել են, թե Վահան Քերոբյանին աշխատանքային թրաֆիքինգի են ենթարկում, նույնիսկ որոշ իրավապաշտպաններ պատրաստակամություն են հայտնել պաշտպանել տարաբախտ նախարարի աշխատանքային իրավունքները։ Տարակուսելին այն է, որ քաղաքական պաշտոն զբաղեցնող անձինք դարձել են Նիկոլ Փաշինյանի պատանդը, և անգամ ի վիճակի չեն հրաժարականի դիմում ներկայացնել։
Արեն Հակոբյան
