Նիկոլ Փաշինյանի հայտարարությունները շատ ծանր վիճակի մեջ են դնում հայկական կողմին
ՔԱՂԱՔԱԿԱՆՈՒԹՅՈՒՆ
Արցախի Հանրապետության Ազգային ժողովը հայտարարություն է տարածել ՀՀ վարչապետ Նիկոլ Փաշինյանի առցանց ասուլիսի ժամանակ արցախյան հարցին առնչվող հնչած հայտարարությունների վերաբերյալ: Արցախի ԱԺ-ն հայտարարել է, որ Արցախի ճակատագիրը որևէ քաղաքական ուժի մենաշնորհը չի եղել և չի լինելու այս հայտարարությանն էլ նախորդել էին Արցախի նախագահի ֆեյսբուքյան գրառումն ու հայկական երկու պետության Մարդու իրավունքի պաշտպանների հայտարարությունը:
Այս թմենայի մասին զրուցել ենք քաղաքագետ Արմեն Բաղդասարյանի հետ։
Հարցին, թե արդյո՞ք այս հայտարարությունը ցույց է տալիս, որ, ինստիտուցիոնալ խզում կա պաշտոնական Երևանի և Ստեփանակերտի միջև` քաղաքագետն ասաց․ «Նիկոլ Փաշինյանի դեկտեմբերի 24-ի ասուլիսը և դեկտեմբերի 26-ի պարզաբանումներն ավելի շատ ցույց են տալիս, որ նա կարծես թե մտադիր է պաշտոնապես հրաժարվել Արցախի հարցում որևէ մասնակցությունից, նրա այդ շոկային հայտարարությունները, ըստ էության, շատ ծանր վիճակի մեջ են դնում հայկական կողմին, դրա համար էլ Արցախի թե՛ իշխանությունները, թե՛ հասարակական տարբեր շրջանակներ անմիջապես արձագանքեցին դրան: Այո՛, կարծես թե այդ խզումը կա, ու շատ վատ է, որ Հայաստանի ու Արցախի իշխանությունները նման հարցերը սկսել են քննարկել հրապարակավ՝ ինչ-որ ֆեյսբուքյան հայտարարություններով, այդ ֆորմատն անթույլատրելի է: Ընդհանուր իրավիճակը բացասական եմ գնահատում, ինչի պատճառը Նիկոլ Փաշինյանի չմտածված հայտարարություններն են ու մանիպուլյացիաները»։
Անդրադառնալով հարցին, թե ինչո՞ւ են այդ քննարկումները տեղափոխվել ֆեյսբուքյան հարթակ քաղաքագետն ասաց․ «Որովհետև Նիկոլ Փաշինյանն ինքը սկսեց այդ հարթակներում վիճելի փաստարկներ բերել, բնականաբար, եթե նա այդ մասին խոսում է այդ հարթակներում, պատասխանն էլ պիտի այդ հարթակներում լիներ: Այսինքն՝ Նիկոլ Փաշինյանը փորձում է հասարակությանը ինչ-որ բան բացատրել, ցույց տալ, որ ինքը մեղք չունի այս իրավիճակի հարցում, որ ամեն բան մինչև իր գալն էր կանխորոշված, այսինքն՝ նա ներքաղաքական խնդիր է լուծում, իր վարկանիշի խնդիրն է փորձում լուծել: Բնականաբար, դա պետք է անի հրապարակային, որպեսզի հնարավորինս ավելի շատ մարդիկ դա տեսնեն: Այս ամենը ոչ թե բանակցային գործընթացի մասին է, այլ իր վարկանիշը փրկելուն միտված ջանքեր են»:
Սոնա Գիշյան
