Հայ-թուրքական երկխոսության տեսանելի և անտեսանելի խութերը․ Փաշինյանի իշխանությունը թաքցնում է փաստերը

Հայ-թուրքական հարաբերությունների կարգավորման համար երկուստեք նշանակված բանագնացների առաջին հանդիպումը տեղի կունենա Մոսկվայում։ Այդ մասին երեկ հայտարարել է Թուրքիայի ԱԳ նախարար Մևլյութ Չավուշօղլուն:

«Մեր տպավորությամբ, բանագնացների առաջին հանդիպումը տեղի է ունենալու Մոսկվայում: Հայկական կողմը նման ցանկություն է հայտնել: Բացի այդ, մենք ուզում ենք, որ հանդիպումից առաջ էլ կողմերը ուղիղ շփումներ ունենան: Բանագնացները նշանակվել են ուղղակի երկխոսության համար», - նշել է Թուրքիայի արտգործնախարարը:

Չավուշօղլուն ընդգծել է, թե Հայաստանից դրական ազդակներ է ստանում Երևան-Ստամբուլ չարթերային չվերթների մեկնարկի շուրջ։ Ընդ որում, Թուրքիայի ԱԳ նախարարը ամեն առիթով շեշտում է, թե գործընթացն իրականացվում է Բաքվի հետ համակարգմամբ՝ Ադրբեջանի շահերը հաշվի առնելով։ Հայ-թուրքական հարաբերությունների բարելավման այս նոր փուլի մասին խոսել է նաև Թուրքիայի նախագահի խոսնակը: Չիկագոյի թուրքական հյուպատոսարանում ամերիկաբնակ թուրքերի հետ հանդիպման ժամանակ Իբրահիմ Քալընը հայտարարել է, թե հակաթուրքականությունը Միացյալ Նահանգների հայկական լոբբիի ինքնության մի մասն է դարձել և հիմա Կովկասում տեղի ունեցող գործընթացը կոտրում է հայկական սփյուռքի փաստարկները:

«Թուրքիայի և Ադրբեջանի հետ հարաբերությունների կարգավորումից ամենից շատ Հայաստանը կշահի՝ առևտրատնտեսական ու քաղաքական առումով, և հայկական սփյուռքը պետք է տեսնի այս իրականությունը», - ընդգծել է Թուրքիայի նախագահի խոսնակը:

Հաշվի առնելով ցեղասպանության հանգամանքը՝ դժվար չէ նշել, որ հայ-թուրքական երկխոսությունը ուղղված է լինելու հենց սփյուռքի և նրա լոբբիստական կառույցների դեմ, ավելի է հեռացնելու սփյուռքին հայաստանյան իրողություններից, սեպ է խրելու հայության երկու հատվածների միջև։ Թերևս, հենց սա է Փաշինյանի իշխանության հանցավոր մտահղացումներից մեկը։ Թուրքիայի ԱԳ նախարարի հայտարարությունից հետո ՀՀ ԱԳՆ մամուլի քարտուղար Վահան Հունանյանը հաստատել է, որ քննարկվում է բանագնացների՝ Հայաստանի Ազգային ժողովի փոխխոսնակ Ռուբեն Ռուբինյանի և Վաշինգտոնում Թուրքիայի նախկին դեսպան Սերդար Քըլըչի հանդիպումը Մոսկվայում անցկացնելու հնարավորությունը: Հունանյանը միևնույն ժամանակ նշել է՝ Հայաստանի և Թուրքիայի հատուկ ներկայացուցիչների հանդիպման ժամկետի վերաբերյալ պայմանավորվածություն այս պահին չկա։

Ձևավորված արատավոր ավանդույթի համաձայն՝ հայկական կողմը դժկամությամբ է տեղեկություններ հայտնում այս նուրբ և միաժամանակ բարդ հարցի շուրջ, իսկ հայ հանրությունը տեղեկությունները ստանում է բացառապես թուրքական կողմից։ Ավելին, թեև հայկական իշխանությունները պնդում են, որ Անկարայի հետ երկխոսության են գնում առանց նախապայմանների, թուրք պաշտոնյաները բազում անգամներ հնչեցրել են իրենց նախապայմանները՝ «Զանգեզուրի միջանցքի» բացումը, հարևանների տարածքային ամբողջականության ճանաչումը։

Վահան Մաթևոսյան