Նորաոճ և թրենդային Քոչարյանը․ ի՞նչ ժամացույց էր կրում երկրորդ նախագահը ասուլիսի ժամանակ

Եռանդուն ու սպորտային․ Հայաստանի երկրորդ նախագահ Ռոբերտ Քոչարյանը երեկ մեծ ասուլիս է տվել, անդրադարձել Արցախի շուրջ ստեղծված իրավիճակին, իշխանության և ընդդիմության անելիքներին, «Հայաստան» դաշինքի որդեգրած քաղաքականությանը։ Երկրորդ նախագահը հայկական քաղաքական դաշտում մշտապես հայտնի է իր եռանդուն բնավորությամբ, սպորտի նկատմամբ մեծ սիրով, և անգամ այս տարիքում ավելի երիտասարդ տեսք ունի, քան բազմաթիվ, նույնիսկ իրենից տարիքով երիտասարդ գործիչները։

Ուշադիր հեռուստադիտողը թերևս նկատեց, որ Ռոբերտ Քոչարյանի ձեռքին ոչ թե դասական ժամացույց է, ինչպես սովորաբար նա սիրում է կրել, այլ սմարթ ժամացույց։ Առավել ուշադիր լինելու դեպքում կարելի է նկատել, որ երկրորդ նախագահը կրում է Garmin Forerunner 55 մակնիշի մարզական ժամացույց, որի արժեքը Amazon-ում 199 դոլար է, իսկ հայաստանյան խանութներում՝ 114 հազար դրամ։ Այդ ժամացույցն ի դեպ, կրում են վազքի սիրահարները։

Ըստ էության, երկրորդ նախագահը ցույց է տալիս, որ որքան էլ իրենց հին ու նախկին համարեն, ինքն ավելի արագ է ադապտացվում նոր իրողություններին, փորձում է ժամանակակից ու թրենդային լինել, իսկ բարձրաստիճան նախկին ու ներկա պաշտոնյաների մեջ առավել եռանդուն ու հոգով երիտասարդ։ Երկրորդ նախագահն, իհարկե, ապահովված մարդ է, կարող էր կրել թանկարժեք կամ չափազանց թանկարժեք ժամացույցներ, բայց իր մարզական ոճը և եռանդն ընդգծելու համար է կրում սմարթ-ժամացույցը։

Ընդհանրապես, արտաքին տեսքը, խնամվածությունը, մարզական կեցվածքը քաղաքական գործիչների համար կարևորագույն նշանակություն ունեն։ Նույնիսկ հայկական չհաջողված «հեղափոխության» պարագլուխը երեք տարի առաջ մարզասրահ էր գնում, փորձում էր ցույց տալ, թե սպորտի հետ որևէ առնչություն ունի։ Այսօր մենք տեսնում ենք երկու չափազանց տարբեր անհատների՝ եռանդուն, սպորտային ընդդիմության առաջնորդի, և նրանից երկու տասնամյակ փոքր, բայց արդեն ծերացած իշխանության պարագլխի։

Արմեն Գաբրիելյան