Նիկոլ Փաշինյանը՝ ադրբեջանական օրակարգի առաջամարտիկ

Ադրբեջանն ու Թուրքիան կարիք չունեն Հայաստանում իրենց քարոզչական թեզերն առաջ մղելու, այդ գործը հաջողությամբ իրականացնում է Հայաստանի վարչապետի աթոռին պատահաբար հայտնված Նիկոլ Փաշինյանը։ Երեք ժամ տևած իր առցանց ասուլիսում Նիկոլ Փաշինյանն այնքան ադրբեջանամետ հայտարարություններ է արել, որ անգամ Իլհամ Ալիևը կզարմանար։

«Արցախը Հայաստան է և վերջ» ժամանակին հայտարարող Նիկոլ Փաշինյանը երեկ տրամագծորեն հակառակ տեսակետն է հայտնել։

«Արցախը չէր կարող ամբողջությամբ լինել հայկական, ինչ է նշանակում պետք է լինի հայկական, ժողովրդի կազմը նկատի ունե՞ք, ոչ, երիցս ոչ, Արցախն ունենալու էր և՛ հայկական, և՛ ադրբեջանական բնակչություն»,- ասել է Փաշինյանը։

Նա հայտարարել է, թե ԼՂԻՄ-ը բանակցային բովանդակության մեջ երբեք հայկական չի եղել։ 44-օրյա պատերազմում Հայաստանին ջախջախիչ պարտության տարած Փաշինյանը կրկին հիշել է նախկիններին, մեղադրել նրանց Հայաստանն աղետի բերելու մեջ, լկտիաբար հայտարարել, թե իրեն հողեր հանձնելու մեջ մեղադրելն անհիմն է։

Ըստ Փաշինյանի՝ Հայաստանը շահագրգռված է խաղաղության պայմանագրի կնքմամբ և պայմանագրի բանակցությունների մեկնարկով։

«Վերջերս ԵԱՀԿ Մինսկի խմբի համանախագահներն էլ բանակցային մի օրակարգ էին առաջարկել, որի կետերից մեկը խաղաղ և համապարփակ կարգավորման խնդիրն էր: Մենք դրանով շահագրգռված ենք, չենք հրաժարվել այդ թեմայով խոսել և չենք հրաժարվելու»,- ասել է նա:

Իսկ մինչ Նիկոլ Փաշինյանը համացանցով տարածում էր ադրբեջանական թեզերը, Ադրբեջանի նախագահ Իլհամ Ալիևն իր ծննդյան օրվա կապակցությամբ զորամաս էր բացում հայկական Հադրութում, սպառնալիքներ տեղում Հայաստանի հասցեին։

«Բաքուն կկանխի Ադրբեջանի տարածքային ամբողջականությանը սպառնացող վտանգները։ Եթե Հայաստանը կրկին փորձի մեզ համար վտանգի աղբյուր լինել, ապա նրանց վերջը կլինի նույնը, ինչ Ղարաբաղյան երկրորդ պատերազմում», - ասել է Իլհամ Ալիևը։ Նա նշել է, որ «պատերազմից հետո Ադրբեջանը չի դադարեցրել բանակաշինությունը և չի կրճատել բանակի ծախսերը, այլ, հակառակը, ավելացրել է»։

«Իրականացվում են պատերազմից հետո կնքված նոր պայմանագրերը, որոնց հիման վրա ներկրվում է ամենաժամանակակից զենք և տեխնիկա»,-ասել է նա։

Տիգրան Մարտիրոսյան