Մինչև Թուրքիան չճանաչի Հայոց ցեղասպանությունը, մենք անընդհատ նրանից վտանգ ենք սպասելու
ՔԱՂԱՔԱԿԱՆՈՒԹՅՈՒՆ
Արցախյան 44-օրյա պատերազմից մեկ տարի էլ չանցած, Նիկոլ Փաշինյանը սկսեց հաճախակի հայտարարել, թե հայ-թուրքական հարաբերությունների վերաբերյալ Թուրքիայից ստանում է դրական ազդակներ։ Սակայն թե ինչ դրական ազդակների մասին է խոսքը՝ մինչ օրս Նիկոլ Փաշինյանը չի մանրամասնել։
Այս թեմայով զրուցել ենք թուրքագետ Ռուբեն Սաֆրաստյանի հետ։
Թուրքագետն անդրադառնալով հայ-թուրքական հարաբերությունների հաստատման համար ընթացող գործընթացներին, ասաց․ «Ես չեմ կարող ասել, թե հայկական կողմը որքանով կկարողանա պաշտպանել հայկական շահը, բայց այդ շահի պաշտպանությունն այս գործընթացում այլընտրանք չունի։ Բոլոր այն նախապայմանները, որոնք Թուրքիան առաջ է քաշում ու դնում Հայաստանի առջև, պետք է մի կողմ մղել՝ Հայաստանն այդ նախապայմաններով չպետք է բանակցի։ Եթե Թուրքիան այդ բանակցությունների սկզբում նախապայմաններ է դնում, նշանակում է՝ Հայաստանին որպես հավասար պետություն չի ընդունում՝ սա անընդունելի է։ Ստեղծվել է այնպիսի իրավիճակ, որ Ֆրանսիան, Միացյալ Նահանգները և Ռուսաստանը ողջունեցին այս բանակցությունների սկիզբը։ Խուսափել այդ բանակցություններից՝ ուղղակի անիմաստ է, որովհետև մենք չենք կարող Թուրքիայի հետ հարաբերվել՝ մեր հետևում չունենալով աջակիցներ։ Իսկ այստեղ մեր աջակիցը Ռուսաստանի Դաշնությունն է, Միացյալ Նահագները և Ֆրանսիան, որոնք մեզ լավ են վերաբերվում։ Այստեղ նաև շատ կարևոր է ընդգծել, որ Հայաստանը պետք է սեղանին դնի Թուրքիայի կողմից իրականացրած Հայոց ցեղասպանության հարցը, կա՛մ որպես նախապայման, կա՛մ որպես առաջին քայլ, քանի որ մինչև Թուրքիան չճանաչի Հայոց ցեղասպանությունը, մենք անընդհատ նրանից վտանգ ենք սպասելու, էլ չեմ խոսում այն մասին, որ Թուրքիան 44-օրյա պատերազմի ժամանակ հանդես եկավ՝ որպես թշնամի պետություն»։
Սոնա Գիշյան
