Ֆլիկը բացահայտել է, թե ինչպես է ընդմիջմանը փոխել «Ատլետիկո»-ի դեմ խաղի ընթացքը
ՍՊՈՐՏ
Կատալոնական «Բարսելոնայի» գլխավոր մարզիչ Հանսի Ֆլիկը ամփոփել է Իսպանիայի Լա լիգայի 12-րդ տուրի կենտրոնական հանդիպումը, որում իր գլխավորած թիմը հյուրընկալվելիս 2։1 հաշվով կամային հաղթանակ է տարել Մադրիդի «Ատլետիկոյի» նկատմամբ։ Հետխաղային մամուլի ասուլիսի ընթացքում գերմանացի մասնագետն անդրադարձել է առաջին խաղակեսում թույլ տված սխալներին, ընդմիջմանը կատարված տակտիկական փոփոխություններին և ձեռք բերված երեք միավորի հոգեբանական նշանակությանը։
Վերջին շրջանում ՊՍԺ-ից և Մադրիդի «Ռեալից» կրած պարտություններից հետո կատալոնական ակումբի համար սկզբունքային էր ուժեղ մրցակցի հարկի տակ առավելության հասնելը։ Հարցին, թե 10-բալանոց համակարգով ինչպես կգնահատի այս հաղթանակի կարևորությունը, Ֆլիկը պատասխանել է.
«Տասը՝ տասից։ Մենք ունենք անհրաժեշտ որակները նման բարդ հանդիպումներում հաղթելու համար, և ես լիովին վստահում եմ իմ ֆուտբոլիստներին։ «Ատլետիկոյի» հարկի տակ հաղթելը երբեք հեշտ չէ, սակայն տղաները հիանալի աշխատանք կատարեցին։ Այս երեք միավորը չափազանց կարևոր էր, բայց մրցաշրջանը դեռ երկար է։ Մենք շարունակելու ենք ամեն օր աշխատել մեր նպատակներին հասնելու և տիտղոսներ նվաճելու համար»։
Անդրադառնալով բուն խաղի ընթացքին՝ մարզիչը խոստովանել է, որ առաջին կեսում իր թիմին պակասել է ինտենսիվությունը, սակայն ընդմիջմանը հաջողվել է շտկել իրավիճակը.
«Առաջին խաղակեսում ցանկանում էինք բարձր ճնշում գործադրել, բայց հաճախ չափազանց հեռու էինք գտնվում մրցակցի ֆուտբոլիստներից, ինչը խանգարում էր արդյունավետ պրեսինգին։ Ընդմիջմանը որոշակի շտկումներ կատարեցինք, և երկրորդ կեսում պատկերը փոխվեց։ Առանցքային դեր խաղաց անհատական պրեսինգը։ Հանդիպումը տևում է 90 րոպե․ թեև առաջին խաղակեսը կատարյալ չէր, երկրորդում մենք փայլուն խաղացինք և լիովին արժանի էինք հաղթանակին»։
Գերմանացի մասնագետը բացել է նաև փակագծերը՝ մեկնաբանելով կիսապաշտպան Ֆրենկի դե Յոնգին պաշտպանության աջ եզրում օգտագործելու անսպասելի որոշումը, որը շրջադարձային է եղել խաղի համար.
«Դեռ նախորդ հանդիպման ժամանակ Ֆրենկիի հետ քննարկել էի այդ դիրքում խաղալու տարբերակը, և նա պատրաստակամություն էր հայտնել օգնելու թիմին։ Սկզբնական մտահղացումն այն էր, որ նա եզրային պաշտպանի գոտում հանդես գա մոտ 15 րոպե, իսկ երբ Բեռնալը հոգնի, նոր փոփոխություն կատարենք։ Կարծում եմ՝ այդ որոշումն իրեն լիովին արդարացրեց»։
Ասուլիսի ավարտին «Բարսելոնայի» գլխավոր մարզիչը խոսել է նաև ազգային հավաքականների խաղերով պայմանավորված դադարի մասին՝ հույս հայտնելով, որ ֆուտբոլիստները կվերադառնան առանց վնասվածքների.
«Ֆուտբոլիստների համար նման ծանրաբեռնվածությունը հեշտ չէ, բայց դա նրանց աշխատանքի մի մասն է։ Հուսով եմ՝ հավաքականներում նրանց խաղաժամանակը ճիշտ կկառավարվի»։
Հիշեցնենք, որ Մադրիդի «Մետրոպոլիտանո» մարզադաշտում կայացած խաղում հաշիվը 10-րդ րոպեին բացել էր տանտերերի հարձակվող Ջուլիանո Սիմեոնեն, որին «կապտանռնագույնները» պատասխանել էին Ֆերմին Լոպեսի դուբլով (45′, 66′)։ Այս հաղթանակից հետո «Բարսելոնան» 33 միավորով միանձնյա գլխավորում է Լա լիգայի մրցաշարային աղյուսակը՝ 3 միավորով գերազանցելով երկրորդ տեղում ընթացող Մադրիդի «Ռեալին»։ «Ատլետիկոն» 28 միավորով եզրափակում է լավագույն եռյակը։
