Ահազանգ․ ինչ է կատարվում Վերին Գետաշենի մանկապարտեզի տարածքում

Գեղարքունիքի մարզի Վերին Գետաշեն համայնքի մանկապարտեզ հաճախող երեխաների ծնողներն օրեր առաջ ժողովի ժամանակ տնօրինությանը բողոք են ներկայացրել։

Այս մասին hraparak.am-ին  ահազանգել է ծնողներից մեկը, հասկանալի պատճառներից ելնելով՝ խնդրեց  չհրապարակել անունը։

Նա  նշեց, որ մանկապարտեզի դիմաց վաճառում են շատ վատ որակի քաղցրեղեն, այդ թվում` խիստ վնասակար քաղցր բամբակ, շաքարաքլոր։

Ըստ ծնողի` դպրոցի տնօրենը ասել է` իրենք անզոր են այս հարցը լուծել, առաջարկել է հենց ծնողներն էլ լուծում տան հարցին.  «Դե քանի որ հարցի լուծումը մնաց մեր ուսերին, որոշեցի դիմել լրատվամիջոցին` հույս ունենալով, որ հանրային հնչեղություն տալը խնդիրը կլուծի»։

Մեզ նաեւ փոխանցեց, որ որեւէ կերպ չեն կարողանում երեխաներին զերծ պահել անորակ քաղցրից, ստիպում են ծնողներին գնել դրանք։