«Ռուսաստանի հետ հարաբերություններում առկա ճգնաժամը կհասցնի Հայաստանի դուրս գալուն ՀԱՊԿ-ից»

Գերմանական պետական հեռուստաընկերության dw.com կայքը գրում է, որ կայքի հետ զրուցած հայ փորձագետները նորություն չեն տեսել ՀԱՊԿ-ին Հայաստանի մասնակցությունը սառեցնելու մասին Հայաստանի վարչապետ Նիկոլ Փաշինյանի վերջին հայտարարության մեջ։ 
«Վարչապետի հայտարարությունը միայն հաստատում է, որ Հայաստանի անդամակցությունը ՀԱՊԿ-ին սառեցված է: Մենք բոլորս դա գիտեինք կամ զգում էինք, բայց այն ֆորմալացված չէր»,- լրագրողների հետ զրույցում ասել է Միջազգային հարաբերությունների և անվտանգության հայկական ինստիտուտի տնօրեն, քաղաքագետ Ստեփան Սաֆարյանը։ Հայ քաղաքագետ Ալեքսանդր Իսկանդարյանն էլ ՀԱՊԿ-ում Հայաստանի մասնակցությունը սառեցնելու մասին Փաշինյանի հայտարարությունը որակել է որպես Երևանի և Մոսկվայի միջև հարաբերությունների ճգնաժամի արտացոլում։ «Իսկ ՀԱՊԿ մյուս երկրների հետ հարաբերություններում այդ ճգնաժամը միշտ էլ եղել է, Փաշինյանն իր հայտարարությամբ միայն արձանագրել է իրերի առկա վիճակը»,- պարզաբանել է քաղաքագետը։
Փորձագետները չեն բացառում, որ Հայաստանը, հատկապես անվտանգության ոլորտում իր շփումների դիվերսիֆիկացման ֆոնին, ինչ-որ պահի կարող է որոշել դուրս գալ ՀԱՊԿ-ից, սակայն չեն կարող կանխատեսել, թե երբ և ինչ պայմաններում դա տեղի կունենա։ «Նման քայլը, այնուամենայնիվ, բացասական արձագանք կառաջացնի Ռուսաստանի կողմից, ՀԱՊԿ-ին ֆորմալ մասնակցությունը նշանակում է Ռուսաստանի հետ հարաբերությունների որոշակի ռեժիմի պահպանում»,- նկատել է քաղաքագետ Իսկանդարյանը նշելով, որ թեև Հայաստանը դժգոհ է ՀԱՊԿ-ից, սակայն այլ բան չունի, չկա այլընտրանք: «Չկա որևէ այլ ռազմաքաղաքական դաշինք, որտեղ դուք կարող եք մտնել և ապահովել ձեր անվտանգությունը»,- պարզաբանել է նա։
Միևնույն ժամանակ, հայ փորձագետները կանխատեսել են ապագայում Երևանի և Մոսկվայի հարաբերությունների հետագա վատթարացում։ Քաղաքագետ Ստեփան Սաֆարյանը նշել է, որ Հայաստանի և Ռուսաստանի հարաբերություններում ճգնաժամը միայն կմեծանա և, հնարավոր է, կվերածվի բաց առճակատման։ «Այս իրավիճակում կարևոր է արդյունավետորեն կառավարել ռիսկերը»,- եզրափակել է նա։
Նշենք, որ ՀԱՊԿ-ում Հայաստանի մասնակցության «սառեցման» մասին Նիկոլ Փաշինյանի հայտարարությունը որոշակի շփոթություն է առաջացրել կազմակերպությունում։ Փաստն այն է, որ ՀԱՊԿ կանոնադրությունը չի նախատեսում մասնակցության սառեցման ռեժիմ։ Կա միայն կազմակերպությունից երկրի կամավոր դուրս գալու հնարավորություն, որի համար պետք է համապատասխան ծանուցում ներկայացնել ելքի ամսաթվից վեց ամիս առաջ: Մեկ այլ տարբերակ է երկրի անդամակցությունը կասեցնելը, եթե նա հրաժարվում է կատարել կազմակերպության կանոնադրության դրույթները և նրա խորհրդի որոշումները:

Նյութը հրապարակման պատրաստեց Կամո Խաչիկյանը

www.1or.am