Փաշինյանը չի կարողանում ապահովել նույնիսկ սեփական ընտանիքի անվտանգությունը, ուր մնաց...

Նիկոլ Փաշինյանը չի կարողանում ապահովել նույնիսկ սեփական ընտանիքի անվտանգությունը, ուր մնաց թե կարողանա ապահովել Հայաստանի Հանրապետության անվտանգությունը։ Երեկ երեկոյան սոցիալական ցանցերում բուռն քննարկում էր ընթանում վարչապետի որդու՝ Աշոտ Փաշինյանի հետ կատարվածի շուրջ։

Քննչական կոմիտեի, ոստիկանության, ինչպես նաև իշխանամետ մամուլի տեղեկություններով զոհված զինծառայողների հարազատների «Որդիների կանչ» կազմակերպության անդամները իբր փորձել են առևանգել Աշոտ Փաշինյանին։ Վերջինս էլ դուրս է նետվել մեքենայից, վրաերթի ենթարկվել մեկ այլ մեքենայի կողմից։ «Որդիների կանչ»-ը հերքում է տեղեկությունը, նույնիսկ տեսանյութ են հրապարակել, թե ինչպես է Աշոտ Փաշինյանը ինքնակամ գնում և նստում մեքենան՝ Եռաբլուր գնալու։ Դրանից հետո քննչական կոմիտեն հրապարակեց Աշոտ Փաշինյանի ցուցմունքներից մի հատված, որտեղ նա նշել է, թե ինքն է ինքնակամ նստել, սակայն հետո վախեցել է և դուրս է նետվել մեքենայից։

Չցանկանալով խախտել անմեղության կանխավարկածը՝ չենք ցանկանա անդրադառնալ գործի իրավական ընթացքին, ընթանում է քննություն, և թե՛ իշխանությունը իր իրավապահ մարմիններով, և թե՛ փաստաբանները մանրամասն ներկայացնում են կատարվածի վերաբերյալ իրենց դիրքորոշումները։

Աշոտ Փաշինյանի հետ կատարվածը կարելի է զուգահեռել մեկ այլ դեպքի՝ Ազգային ժողովի նախագահ Ալեն Սիմոնյանի, դաշնակցական երիտասարդի դեմքին թքելու հետ։ Եթե, մի բանը, որ թույլատրված է Ալեն Սիմոնյանին, արգելվում է զոհված զինծառայողի ծնողներին, ավելին, նույն Փաշինյանը Ալեն Սիմոնյանի արարքը փորձում էր արդարացնել նրա «մարդ» լինելու հանգամանքով, իսկ զոհված զինծառայողների ծնողներն ավելի «մարդ» են, ավելի մեծ իրավունքներ ունեն և իշխանությունից պահանջելու իրավունք։ Մարդիկ 2,5 տարի անց չեն կարողանում արդարություն գտնել իրենց որդիների մահվան համար և Փաշինյանի ու նրա ընտանիքի վարքի պատճառով նրանց նկատմամբ ատելությունը գնալով աճում է։

Միևնույն ժամանակ տարակուսելի է, որ Փաշինյանի որդին «պատահաբար» հայտնվում է մի վայրում, որտեղ գտնվում են զոհված զինծառայողների ծնողները։ Ակամայից հարց է ծագում, արդյո՞ք Փաշինյանն ու իր ընտանիքը միակ զավակին օգտագործում են որպես խայծ՝ իրենց ընդդիմադիր տրամադրված զոհվածների հարազատներին սադրելու նպատակով։

Թերեզա Ալեքսանյան